Ref. No. 3559/47-9565

الجواب

بسم اللہ الرحمن الرحیم: ۔           اگر کسی نے کسی غیر مسلم پر ظلم کیا ہو تو اس کا حق براہِ راست معافی یا نقصان کی تلافی سے ادا کرنا واجب ہے۔ اگر معافی مانگنے سے فتنہ یا خطرہ ہو تو کسی اور جائز طریقے سے اس کا نقصان پورا کرے، اور نیز صدقہ کرکے  اس کے لیے ہدایت کی  دعا کرے  اوربرابر اپنے لئے استغفار بھی کرتارہے۔  تاہم صرف دعا اور صدقہ حق العبد کی ادائیگی  کے لئے کافی نہیں ہے۔صدقہ سے اس کو دنیا میں فائدہ پہونچ سکتاہے۔ اور اس کے علاوہ معافی کے لئے آپ کے پاس کوئی چارہ نہیں ہے۔

"من كانت عنده مظلمة لأخيه من عرضه أو من شيء فليتحلله منه اليوم قبل أن لا يكون دينار ولا درهم" (صحیح بخاری، حدیث: 2449)

"إن لم يقدر على الاستحلال منه لخوف ضرر أو فتنة، فليدع له ويستغفر له، وليتصدق عنه بما أمكن" (رد المحتار، ج 6، ص 144)

واللہ اعلم بالصواب

دارالافتاء

دارالعلوم وقف دیوبند

Ref. No. 3554/47-9565

الجواب

بسم اللہ الرحمن الرحیم: ۔         والد اپنی زندگی میں اپنی جائداد کا مکمل مالک اور بااختیار ہے۔ وہ اپنی مرضی سے کسی اولاد کو کچھ دیدے  اور کسی کو نہ دے یہ اس کی اپنی مرضی ہے۔ وراثت اس مال کو کہتے ہیں جو مرنے والا اپنے پیچھے چھوڑ کر مرجائے، زندگی میں جو مال والد کا ہے وہ وراثت نہیں کہلائے گا۔ تاہم اگر باپ اپنی زندگی میں اپنی جائداد کو تقسیم کرنا چاہے تو اس کو تمام اولاد میں برابر تقسیم کرنا چاہئے۔ البتہ اگر کسی کو اس کی خدمت کی بنا پر یا کسی اور معقول وجہ کی بنا پر کچھ زیادہ دیدے تو اس کی بھی گنجائش ہے، لیکن کسی وارث کو محروم کرنے کی نیت سے اپنی جائداد اپنی زندگی میں تقسیم کرنا اور بیٹوں یا بیٹیوں میں سے کسی کو محروم کرنا جائز نہیں ہے۔ باپ کی نیت کسی کو محروم کرنے کی نہ ہو تو کمی بیشی کے ساتھ دینا بھی جائز ہے۔ 

واللہ اعلم بالصواب

دارالافتاء

دارالعلوم وقف دیوبند

Ref. No. 3552/47-9554

الجواب

بسم اللہ الرحمن الرحیم: ۔        مشت زنی  یقینا حرام و ناجائز عمل ہے،  اور اس پر سچی توبہ و استغفار اس کا کفارہ ہے۔ اس عمل کو  اب فوری طور پر روک دیں ، اور آئندہ اس سے بچنے کا عزم کریں اور گزشتہ عمل پر جو اب تک ہوتا رہا  اپنی ندامت اور شرمندگی کا ظہار کریں، یہی توبہ اور ماضی پر افسوس اس گناہ کا کفارہ ہے۔ اگر کچھ حسب حیثیت صدقہ کردیں تو بہت اچھا ہوگا ا اس لئے کہ صدقہ بھی گناہوں کو مٹانے میں اہم کردار ادا کرتاہے ۔

’عن أنس بن مالك، عن النبي صلى الله عليه وسلم قال: "سبعة لاينظر الله عز وجل إليهم يوم القيامة، ولايزكيهم، ولايجمعهم مع العالمين، يدخلهم النار أول الداخلين إلا أن يتوبوا، إلا أن يتوبوا، إلا أن يتوبوا، فمن تاب تاب الله عليه: الناكح يده، والفاعل والمفعول به، والمدمن بالخمر، والضارب أبويه حتى يستغيثا، والمؤذي جيرانه حتى يلعنوه، والناكح حليلة جاره". " تفرد به هكذا مسلمة بن جعفر هذا ". قال البخاري في التاريخ".(شعب الإيمان 7/ 329) 

واللہ اعلم بالصواب

دارالافتاء

دارالعلوم وقف دیوبند

Ref. No. 3547/47-9547

الجواب

بسم اللہ الرحمن الرحیم: ۔         جس ادارہ سے یہ فتوی جاری ہوا ہے اسی ادارے سے اس کی تصدیق ہوسکتی ہے۔ ہمیں اس سلسلسہ میں کوئی تحقیق نہیں ہے، تاہم اگر یہ درست ہے تو واقعی اس میں خیر ہی خیر ہے۔ جن لوگوں نے بھی اس میں حصہ لیا اللہ تعالی ان کو جزائے خیر عطا فرمائے۔

آپ اپنا سوالنامہ متعلقہ جامعہ میں بھیجیں اور وہاں سے تصدیق یا تکذیب کا انتظار کریں۔ یا ان کی حوالہ میں موجود کتابوں میں پڑھیں شاید آپ کو اس فتوی کی حقیقت کا علم ہوجائے۔

واللہ اعلم بالصواب

دارالافتاء

دارالعلوم وقف دیوبند

Ref. No. 3551/47-9552

الجواب

بسم اللہ الرحمن الرحیم: ۔        آپ کے پیسے بڑے بھائی کے پاس بطور قرض کے ہیں، آپ نے دو سال کی مہلت دی تھی تو اس مہلت کا لحاظ رکھنا چاہئے۔ تاہم اگر آپ کو ضرورت ہے تو پیشگی مطالبہ کرنا بھی درست ہے؛ دو سال تک مہلت دینا لازم نہیں ہے۔

 (ولزم تأجيل كل دين) إن قبل المديون (إلا) في سبع على ما في مدينات الأشباه بدلي صرف وسلم وثمن عند إقالة وبعدها وما أخذ به الشفيع ودين الميت، والسابع (القرض) فلا يلزم تأجيله. أحكام القرآن للجصاص (2/ 194) وإن كان ذو عسرة فنظرة إلى ميسرة فيه تأويلان أحدهما وإن كان ذو عسرة غريما لكم فنظرة إلى ميسرة. (الدر المختار وحاشية ابن عابدين (رد المحتار) (5/ 157)

واللہ اعلم بالصواب

دارالافتاء

دارالعلوم وقف دیوبند

Ref. No. 3550/47-9553

الجواب

بسم اللہ الرحمن الرحیم: ۔        علماء دیوبند کے نزدیک بریلوی حضرات اسلام سے خارج نہیں ہیں، اس لئے ان کے پیچھے پڑھی ہوئی نمازیں درست ہوگئیں۔ اعادہ کی ضرورت نہیں ہے۔ تاہم آئندہ احتیاط رکھیں۔

واللہ اعلم بالصواب

دارالافتاء

دارالعلوم وقف دیوبند

Ref. No. 3549/47-9546

الجواب

بسم اللہ الرحمن الرحیم: ۔         بہتر یہی ہے کہ آپ اپنے علاقہ کے کسی معتبر عالم سے مل کر کسی پیر طریقت کی رہنمائی حاصل کرلیں، ہماری نظر میں پھول پور کی خانقاہ، الہ آباد کے پیر طریقت حضرت مولانا قمرالزماں صاحب دامت برکاتہم کی خانقاہ بہتر رہیں گی۔ اور اطراف دیوبند میں حضرت مولانا حسین احمد صاحب پانڈولی ضلع سہارنپور اور میرٹھ میں حضرت مولانا صلاح الدین نقشبندی صاحب کی خانقاہ ہے، اسی طرح رائے پور کی مشہور خانقاہ اور وہیں پر حضرت مولانا محمد طاہر صاحب شیخ الحدیث قدیم مدرسہ رائے پور کی صحبت بھی آپ کے لئے مفید ثابت ہوسکتی ہے۔ لکھنو کے اطراف کے علما سے ہماری زیادہ واقفیت نہیں ہے۔

واللہ اعلم بالصواب

دارالافتاء

دارالعلوم وقف دیوبند

Ref. No. 3546/47-9551

الجواب

بسم اللہ الرحمن الرحیم: ۔         اپنے سگے بھانجے اور بھتیجے محرم ہوتے ہیں  ان سے پردہ لازم نہیں ہے۔ اگر کوئی فتنہ کا اندیشہ نہ ہو تو عورت کا اپنے بھتیجے و بھانجے کے ساتھ  بوقت ضرورت باہر جانے میں کوئی حرج نہیں ہے۔ (جن  لوگوں سے نکاح حرام ہے وہ محرم ہیں ان سے پردہ نہیں ہے)۔ جن  سے نکاح حرام ہے ان کی تفصیل  قرآن کریم کی سورہ النساءمیں موجود ہے۔

حُرِّمَتْ  عَلَیْكُمْ  اُمَّهٰتُكُمْ  وَ  بَنٰتُكُمْ  وَ  اَخَوٰتُكُمْ  وَ  عَمّٰتُكُمْ  وَ  خٰلٰتُكُمْ  وَ  بَنٰتُ  الْاَخِ  وَ  بَنٰتُ  الْاُخْتِ  وَ  اُمَّهٰتُكُمُ  الّٰتِیْۤ  اَرْضَعْنَكُمْ  وَ  اَخَوٰتُكُمْ  مِّنَ  الرَّضَاعَةِ  وَ  اُمَّهٰتُ  نِسَآىٕكُمْ  وَ  رَبَآىٕبُكُمُ  الّٰتِیْ  فِیْ  حُجُوْرِكُمْ  مِّنْ  نِّسَآىٕكُمُ  الّٰتِیْ  دَخَلْتُمْ  بِهِنَّ٘-فَاِنْ  لَّمْ  تَكُوْنُوْا  دَخَلْتُمْ  بِهِنَّ  فَلَا  جُنَاحَ  عَلَیْكُمْ٘-وَ  حَلَآىٕلُ  اَبْنَآىٕكُمُ  الَّذِیْنَ  مِنْ  اَصْلَابِكُمْۙ-وَ  اَنْ  تَجْمَعُوْا  بَیْنَ  الْاُخْتَیْنِ  اِلَّا  مَا  قَدْ  سَلَفَؕ-اِنَّ  اللّٰهَ  كَانَ  غَفُوْرًا  رَّحِیْمًا (سورۃ النساء ۲۳)

تم پر حرام کردی گئیں تمہاری مائیں اور تمہاری بیٹیاں اور تمہاری بہنیں اور تمہاری پھوپھیاں اور تمہاری خالائیں اور تمہاری بھتیجیاں اور تمہاری بھانجیاں اور تمہاری وہ مائیں جنہوں نے تمہیں دودھ پلایا اور دودھ (کے رشتے) سے تمہاری بہنیں اور تمہاری بیویوں کی مائیں اور تمہاری بیویوں کی وہ بیٹیاں جو تمہاری گود میں ہیں (جو اُن بیویوں سے ہوں ) جن سے تم ہم بستری کرچکے ہو پھر اگر تم نے ان (بیویوں ) سے ہم بستری نہ کی ہو تو ان کی بیٹیوں سے نکاح کرنے میں تم پر کوئی حرج نہیں اور تمہارے حقیقی بیٹوں کی بیویاں اور دو بہنوں کو اکٹھا کرنا (حرام ہے۔) البتہ جوپہلے گزر گیا۔ بیشک اللہ بخشنے والا مہربان ہے۔

واللہ اعلم بالصواب

دارالافتاء

دارالعلوم وقف دیوبند