Frequently Asked Questions
زیب و زینت و حجاب
Ref. No. 4113/48-10462
الجواب
بسم اللہ الرحمن الرحیم: ۔ شوہر کے سامنے عورت کا سر نہ ڈھانپنا یا بال کھلے رکھنا شرعاً جائز ہے۔ بیوی پر اپنے شوہر کے سامنے سر، بال یا دیگر زینت کو چھپانا واجب نہیں، بلکہ میاں بیوی ایک دوسرے کے لیے مکمل طور پر حلال ہیں اور ایک دوسرے کے سامنے اپنی زینت ظاہر کر سکتے ہیں۔
البتہ اگر گھر میں کوئی غیر محرم موجود ہو یا اچانک آنے کا امکان ہو تو احتیاطاً پردے کا خیال رکھنا چاہیے۔ میاں بیوی کے تعلقات میں باہمی محبت، صفائی اور حسنِ معاشرت کو ملحوظ رکھنا مسنون اور پسندیدہ عمل ہے۔ لہٰذا صرف شوہر کے سامنے سر نہ ڈھانپنا یا بال کھلے رکھنا نہ گناہ ہے اور نہ ہی مکروہ، بلکہ اس میں شرعاً کوئی حرج نہیں۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3781/47-10193
الجواب
بسم اللہ الرحمن الرحیم:۔ عورتوں کے لئے جینس کے طور پر جو کپڑے تیار کئے جاتے ہیں، اگر وہ جسم کی ساخت کے موافق نہیں ہیں اور مکمل پردہ کا لحاظ کیاگیا ہے تو اس میں کوئی حرج نہیں ہے۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3747/47-9847
الجواب
بسم اللہ الرحمن الرحیم:۔ عورت کے لیے بال رنگوانا جائز ہے، بشرطیکہ: رنگ میں کسی ناپاک چیز کی آمیزش نہ ہو، اور وضو وغسل کرتے وقت پانی گزرنے میں رکاوٹ نہ بنے، اور کالے رنگ سے سفید بالوں کو کالا نہ کیا جائے۔ بہتر ہے کہ خالص مہندی کا استعمال کیاجائے، اس سے بالوں کو ایک اچھا کلر ملتاہے اور بالوں کے لئے نقصاندہ بھی نہیں ہے۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3667/47-9774
الجواب
بسم اللہ الرحمن الرحیم: ۔ نماز میں عورت کے لیے پورا بدن ستر ہے، سوائے چہرہ ، دونوں ہتھیلیوں ، اور دونوں قدموں کے۔کلائیاں (wrists) اور بازو کہنی (elbow) تک: یہ سب حصہ عورت کے لیے ستر میں داخل ہے۔ اس لیے نماز میں ان کا ڈھانکنا واجب ہے۔اگر عورت نماز میں کہنی تک بازو کھلا رکھے اور صرف کہنی تک کپڑا ہو تو کلائی سے انگلیوں تک ہاتھ ننگا رہے گا۔ چونکہ عورت کے لیے ہاتھ کی ہتھیلی کے علاوہ باقی حصہ (کلائی سمیت) ستر ہے، اس لیے کلائیاں کھلی رکھنا جائز نہیں۔ اگر چوتھائی حصّہ ستر کا کھلا رہے اور وہ پورے ایک رکن کے برابر وقت تک رہا تو نماز فاسد ہو جاتی ہے۔
خلاصہ یہ ہے کہ عورت کے لیے کلائی تک ہاتھ ڈھانکنا ضروری ہے۔ صرف ہتھیلیاں کھلی رہ سکتی ہیں۔ آپ کی بیوی اگر صرف کہنی تک کپڑا پہن کر نماز پڑھتی ہیں اور کلائیاں ننگی رہتی ہیں تو یہ طریقہ درست نہیں، ان کی نماز مکروہ تحریمی ہوگی، بلکہ بعض صورتوں میں فاسد بھی ہوسکتی ہے۔ بہتر یہ ہے کہ وہ نماز کے وقت ایسا لباس پہنیں جو ہاتھ کی کلائی تک ڈھانپ لے۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3332/46-9145
الجواب
بسم اللہ الرحمن الرحیم:۔ غیرمحرم مردوں سے پردہ کرنا واجب اور ضروری ہے، اس سلسلہ میں ضابطہ یہ ہے کہ جن مردوں سے نکاح کرنا جائز ہے ان سے پردہ کرنا واجب ہے اور جن سے نکاح کرنا جائز نہیں ان سے پردہ واجب نہیں ہے۔
او محرم والمحرم من لا یجوز مناکحتھا علی التابید بقرابۃ او رضاع او صھریۃ (شامی 3/464 زکریا دیوبند)۔
عورت کا یہ کہنا کہ پردہ کرنے پر ثواب ملے گا اور نہ کرنے پر کوئی گناہ نہیں یہ درست نہیں ہے بلکہ پردہ نہ کرنے گناہ ہوگا، اس لئے اپنی بات سے توبہ کرنی چاہئے ، حرام اور معصیت کو حلال جاننا ایمان کے لئے خطرہ کی بات ہے اس لئے شرعی امور میں دخل اندازی کرنا اور گناہ کو حلال جاننا انتہائی جرأت مندانہ بات ہے ، اس سے پرہیز لازم و ضروری ہے۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3336/46-9141
الجواب
بسم اللہ الرحمن الرحیم:۔(۱) اگر کسی فتنہ میں پڑنے کا خوف نہ ہو تو محرم رشتہ داروں کے سامنے عورت کے لئے صرف سر، بال، گردن، کان ، بازو، ہاتھ، پاؤں ، پنڈلی، چہرہ اور گردن سے متصل سینہ کا اوپری حصہ کھولنے کی گنجائش ہے۔ باقی حصوں کا محرم رشتہ داروں کے سامنے بھی ظاہر کرنا جائز نہیں ہے۔
ومن محرمہ، ھی من لا یحل لہ نکاحھا ابدا بنسب او سبب ولو بزنا – الی الراس والجہ والصدر والساق والعضد ان امن شھوتہ وشھوتھا الخ (ردالمحتار مع الدر المختار 6/367)
(۲) آپ خوبصورت نظر آنے کے لئے ایسا نہ کریں، اس میں فتنہ کا اندیشہ ہے۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3236/46-8012
الجواب
بسم اللہ الرحمن الرحیم:۔ عورت کا اپنے محرم کے سامنے نہ تو سر کا کھولنا واجب ہے اور نہ ہی چھپانا واجب ہے۔ عورت کا اپنے محارم کے سامنے اپنے سر کو چھپانا احترام و ادب کے طور پر ہوتاہے۔ اس کو شرعی واجب خیال رکھنا تو یقینا غلط ہے تاہم ادب و حترام کے طور پر اگر وکئی عورت اپنے والد اور بڑے بھائی وغیرہ کے سامنے سر کو ڈھانکتی ہے تو اس کو بدعت نہیں کہاجائے گا، کیونکہ ہمارے معاشرہ میں بڑوں کے سامنے سر ڈھانکنا ادب کا حصہ شمارکیاجاتاہے۔
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 3224/46-7094
الجواب
بسم اللہ الرحمن الرحیم:۔ محرم رشتہ داروں کے سامنے عورت کے لیے سر ، بال، گردن، کان، بازو، ہاتھ ، پاؤں ، پنڈلی، ، چہرہ اور گردن سے متصل سینہ کا اوپری حصہ کھولنے کی گنجائش ہے، بشرطیکہ فتنہ کا اندیشہ نہ ہو ، البتہ احتیاط اسی میں ہے کہ چہر ہ اور ہاتھ پاؤں کے سوا باقی اعضاءکو محارم کے سامنے بھی ڈھکا رکھا جائے۔ نیز محرم عورتوں کے پیٹ، کمر اور پیٹھ اور گھٹنے کا بھی پردہ ہے ان اعضاء کی طرف بھی دیکھنا جائز نہیں ہے۔
ینظر الرجل من ذوات محارمہ إلی الوجہ والرأس والصدر․․․ ولا ینظر إلی ظہرہا وبطنہا وفخذہا (ہدایہ: ۴۶۱/۴) قال فی الشامی:وقال الرحمتی: الظہر ما قابل البطن من تحت الصدر إلی السرة․․․ أی فما حاذی الصدر لیس من الظہر الذی ہو عورة اھ ومقتضی ہذا أن الصدر وما قابلہ من الخلف لیس من العورة وأن الثدی أیضًا غیر عورة وسیأتی فی الحظر والإباحة أنہ یجوز أن ینظر من أمة غیرہ ما ینظر من محرمہ، ولا شبہة أنہ یجوز النظر إلی صدر محرمة وثدیہا فلا یکون فی عورة منہا ولا من الأمة (شامی: ۷۷/۲، ط: زکریا دیوبند)
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 30/-
الجواب
بسم اللہ الرحمن الرحیم:۔ عورتوں کے لئے لمبے بال باعث زینت ہیں، عورتوں کا بلاعذر شرعی سرکے بالوں کا کاٹنا جائز نہیں ہے، البتہ اگر کوئی عذر ہو کہ بال سرین سے نیچے ہوجائیں اور عیب دار معلوم ہوتے ہوں تو فقط زائد بالوں کو کاٹنا جائز ہے۔ لہذا عورت کے لئے کندھے سے دس سینٹی میٹر نیچے سے بال کاٹنا جائز نہیں ہے۔
عن ابن عباس رضي الله عنهما، قال:" لعن رسول الله صلى الله عليه وسلم المتشبهين من الرجال بالنساء، والمتشبهات من النساء بالرجال"،(صحیح البخاری، کتاب اللباس الرقم 5885)
قطعت شعر راسھا اثمت ولعنت فی البزازیۃ ولو باذن الزوج ، لانہ لاطاعۃ لمخلوق فی معصیۃ الخالق ولذا یحرم علی الرجل قطع لحیتہ والمعنی الموثر التشبہ بالرجال “(الدر المختار، کتاب الحظر والاباحۃ: (407/6، 9/670)
واللہ اعلم بالصواب
دارالافتاء
دارالعلوم وقف دیوبند
زیب و زینت و حجاب
Ref. No. 2482/45-3805
بسم اللہ الرحمن الرحیم:۔ ہم نے اس معالجہ کے بارے میں جو کچھ سمجھاہے اس کا خلاصہ یہ ہے کہ: انسانی جلد پر ایک قسم کا روغن ہوتاہے جس کو میلانین کہاجاتاہے، اسی میلانین روغن کو جو بے اثر ہوچکا ہوتاہے از سر نو پیداکرکے اگر فعال کردیا جائے تو جلد کے داغ دھبے ختم ہوسکتے ہیں۔ اس حوالہ سے وہائٹننگ کریم،فیشیئل ماسک، گاجر اور چقندر کا جوس، سبز سیب اور انار کاجوس، پپیتا، لیموں اور کھیرے کاجوس، برف،اور گلیسرین کا مساج اور زیادہ پانی پینا بھی مفید بتایاجاتاہے جو قدرتی طریقہ کارہے۔
ہماری معلومات کے مطابق 'لیزر اِسکِن وائٹننگ ٹریٹمنٹ' چہرہ کے سیاہ دھبوں پر لائٹ کی شعاعوں کی مدد سے جلد کو نرم کرکے اس دھبہ والے جلد کی اوپری سطح کوہٹانے کا یہ ایک طریقہ کار ہے۔ اس میں چہرہ کی نرم جلدوں پر جب شعاعیں پڑتی ہیں تو انسان کو تکلیف بھی ہوتی ہے، اور جلد کی اوپری انتہائی باریک سطح کو ہٹادیاجاتاہے، اس لئے یہ بھی سرجری کی ہی ایک ادنی قسم کہلائے گی ۔مزید برآں لیزر وائٹننگ معالجہ کے نقصانات بھی برداشت کرنے پڑسکتے ہیں۔ جیسے کہ خراش، جلد کی خشکی، سورج کی روشنی میں حساسیت، جکڑن، سوجن، داغ، جلد کے انفیکشن، جلد کی ساخت میں فرق، رنگت، جلد کی سرخی اور جلن۔ اور اس طریقہ علاج کے بعد جلد کے ٹھیک ہونے میں تقریبا تین ہفتے درکار ہوتے ہیں۔
الغرض اگرمیلانین روغن کی افزائش کا قدرتی اشیاء کے ذریعہ علاج کیاجائے ، یعنی مخصوص غذاؤں اور جوس کا استعمال، قدرتی چیزوں کا مساج اور میک اپ کے کریم وغیرہ کا استعمال کیاجائے تو بہت بہتر ہے اور اس طرح گورا ہونا اور چہرے کی رنگت کو نکھارنا درست جائز ہے، البتہ سوال میں مذکور طریقۂ علاج جائز نہیں ہے، یہ تغیر لخلق اللہ میں داخل ہے، اللہ رب العزت نے جس رنگ کا جس کو بنایا ہے، اسی پر انسان کو راضی رہنا چاہیے، اور مذکورہ طریقہ علاج سے گریز کرنا چاہئے۔
واللہ اعلم بالصواب
دارالافتاء
دارالعلوم وقف دیوبند