احکام میت / وراثت و وصیت

Ref. No. 3800/47-9900

الجواب

الجواب وباللہ التوفیق: بشرط صحت سوال صورت مسئولہ میں کہ دادا ابو نے یہ رقم (22 لاکھ روپے) آپ کے والد صاحب کو ادھار کے طور پر دی تھی، اور والد صاحب نے بعد میں یہ رقم واپس نہیں کی، بلکہ کہا کہ میرے پاس پیسے نہیں ہیں،تو شرعاً وہ رقم دادا ابو کا قرض شمار ہوگی۔کیونکہ ضابطہ یہی ہے کہ جس نے کسی کو مال دیا بطورِ قرض، وہ مال دینے والے کی ملکیت میں باقی رہتا ہے، جب تک واپس نہ کیا جائے یا صاف طور پر معاف نہ کیا جائے۔ اس لئے دادا ابو جب تک اس قرض کو صاف لفظوں میں معاف نہ کریں، وہ رقم واجب الادا قرض رہے گی۔اگر دادا ابو نے صرف مجبوری یا ناراضگی میں کہا ہو کہ "میرے حصے سے کٹ جائیں"، تو یہ قرض کی معافی نہیں مانی جائے گی۔شریعت میں قرض، وراثت تقسیم ہونے سے پہلے ادا کیا جاتا ہے۔پھر یہ بھی یاد رکھئے کہ اگر دادا ابو کے انتقال سے قبل یہ رقم واپس نہ کی گئی اور انہوں نے معاف بھی نہ کی،تو یہ 22 لاکھ روپے ان کے ترکہ (وراثت) میں شمار ہوں گے۔اور والد صاحب پر لازم ہوگا کہ 22 لاکھ واپس کریں۔اس کے بعد  وہ ان کے تمام وارثوں (5 بیٹے اور 2 بیٹیاں) میں شرعی حصوں کے مطابق تقسیم کیا جائے گا۔یعنی:ہر بیٹے کو دو حصے،ہر بیٹی کو ایک حصہ ملے گا۔ اگر والد صاحب نے دادا ابو سے جھوٹ بولا کہ "میرے پاس پیسے نہیں ہیں" حالانکہ پیسے تھے تو  یہ عمل باعث گناہ ہے ، ایسے شخص پر لازم ہے کہ وہ سچی توبہ کرے اور قرض ادا کرے۔نبی ﷺ نے فرمایا:مطل الغنی ظلم “مالدار کا قرض ادا کرنے میں ٹال مٹول  کرنا ظلم ہے۔” (صحیح بخاری: 2400)

واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3803/47-9898

الجواب

الجواب وباللہ التوفیق:  ۔    اگر بہو کو پلاٹ پر قبضہ نہیں ملا تھا  ، تو وہ پلاٹ دادا ہی کی ملکیت رہا، اور وراثت میں شامل ہوگا۔اگر بیٹے نے قسطیں بلا شرط دی تھیں  تو وہ واپسی کا حق نہیں رکھتا۔اگر قسطیں شرط کے ساتھ قرض کے طور پر دی تھیں  تو دادا پر واجب ہے کہ وہ رقم واپس کریں (اگر باحیات  ہوں)، یا ان کے ترکے سے ادا کی جائے۔پلاٹ کی شرعی تقسیم کے لیے قبضہ، نیتِ ہبہ، اور وراثت کی تفصیلات طے کر کے حساب لگانا ہوگا۔

واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3787/47-9894

الجواب

بسم اللہ الرحمن الرحیم:۔   اگر پہلی میت کی ہڈیاں بوسیدہ ہو کر مٹی میں مل چکی ہوں (یعنی جسم کا کوئی حصہ باقی نہ ہو)، تو اسی قبر میں دوبارہ میت دفنانا جائز ہے۔لیکن جب تک پہلی میت کا جسم یا ہڈیاں باقی ہوں، دوسری میت کو اس میں دفن کرنا ممنوع ہے۔ عام طور پر ۳ سے ۵ سال میں جسم مٹی میں مل جاتا ہے۔لیکن کچھ علاقوں میں نمی یا سخت زمین کی وجہ سے ۷ یا ۸ سال بھی لگ سکتے ہیں۔اس سلسلہ میں ماہرین سے اندازہ لے لیا جائے، اور  اگر قبر کھولنے پر معلوم ہوا کہ پہلی میت ابھی باقی ہے تو مٹی کی آڑ بناکر اس میں دوسری میت  دفن کی جا سکتی ہے۔

"وسئل أبو بكر الأسكافي عن المرأة تقبر في قبر الرجل؟ فقال: إن كان الرجل قد بلي ولم يبق له لحم ولا عظم جاز، وكذا العكس، وإلا فإن كانوا لايجدون بداً يجعلون عظام الأول في موضع، وليجعلوا بينهما حاجزا بالصعید." (حاشية  طحطاوی، ص: 613، ط: دار الکتب العلمیة)

‌"ولا ‌يدفن ‌اثنان أو ثلاثة في قبر واحد إلا عند الحاجة." (الھندیۃ، الباب الحادی والعشرون فی الجنائز، کتاب الصلوٰۃ، ص/166، ج/1، ط/رشیدیہ)

واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3773/47-9842

الجواب

بسم اللہ الرحمن الرحیم:۔  مرحومہ  کا کل ترکہ ۳۶ حصوں میں تقسیم ہوگا، جن میں سے شوہر  کو ۹حصے، والدین  میں سے ہر ایک کو چھ ۶ حصے، اور بیٹے کو ۱۰ حصے اور بیٹی کو ۵ حصے ملیں گے۔

واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3697/47-9826

الجواب

بسم اللہ الرحمن الرحیم:۔    (۱)  مرحوم نے جو زمین اپنی زندگی میں اپنی دوسری بیوی کودیدی اور  مالک بنادیا وہ زمین دوسری بیوی کی ذاتی ملکیت ہے، اس میں میراث جاری نہیں ہوگی۔  (۲) مرحوم کی وفات کے وقت جو مال و اسباب اان کی ملکیت میں تھے ان مٰں سے قرض ادا کیاجائےگا اور پھر جو بچے گا اس میں وراثت جاری ہوگی، اور دوسری بیوی کو بھی اس  وراثت میں حصہ ملے گا۔ (۳) اگر وہ مسلمان ہونے کا دعوی کرتی ہے توغیرمسلم سے نکاح کرنے پر وہ وراثت سے محروم نہ ہوگی، (۴) اگر سوال مذکور میں تین بھائیوں  سے مراد مرحوم کے تین بھائی ہیں تو پوری جائداد اور مال کو 144 حصوں میں تقسیم کریں گے جن میں سے ہر ایک بیٹی کو 32 حصے، اور ہر ایک بیوی کو 9 حصے اور مرحوم کے ہر ایک بھائی کو 10 حصے ملیں گے۔

(نوٹ: ۔ اگر تین بھائی سے مراد تین بیٹے یعنی بیٹیوں کے بھائی ہیں تو مسئلہ بدل جائے گا)۔

 واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3696/47-9827

In the name of Allah, the most Gracious the most Merciful

The answer to your question is as follows:

Whatever the mother gave to her children during her lifetime — whether it was land, a house, or money from the sale of such property — and made them its rightful owners, now belongs solely to them. It will not be counted as part of her estate after her death.

If she gave it by selling property or from her own personal funds, it remains the exclusive possession of the recipients.

It should also be noted that any money the sons contributed toward the construction of the house was merely to assist their father. Therefore, it will be considered a voluntary contribution (tabarru‘ and ihsān), and they are not entitled to claim that amount back or deduct it from the estate.

Accordingly, the entire current value of the house must be included in the estate and distributed among all the heirs.

(However, if at the time of contributing funds there was any formal agreement made with the father, it should be presented in writing, and the ruling may be reconsidered in light of that agreement.)

Finally, all the existing property, wealth, and belongings should be divided into eleven equal shares, with each son receiving two shares and each daughter one share, in accordance with Islamic inheritance law.

And Allah knows best

Darul Ifta

Darul Uloom Waqf Deoband

احکام میت / وراثت و وصیت

Ref. No. 3689/47-9763

الجواب

بسم اللہ الرحمن الرحیم:۔     احادیث و آثار سے یہ بات ثابت ہے کہ دفن کے بعد قبر کی مٹی پر پانی چھڑکنا مستحب ہے۔ اس کی اصل حضرت ابورافعؓ کی روایت سے ملتی ہے کہ رسول اللہ ﷺ نے سعد بن معاذؓ کی قبر پر پانی چھڑکنے کا حکم دیا۔ حضرات فقہاء کرام نے اسی بنیاد پر لکھا ہے کہ قبر کی مٹی کو جمانے اور بیٹھنے سے بچانے کے لیے پانی چھڑکنا سنت و مستحب ہے۔

لہذا  اگر مٹی کو جمانے کے مقصد سے پانی چھڑکا جائے، تو یہ عمل جائز اور مستحب ہے، کیونکہ یہی مقصدِ حدیث ہےکہ قبر کی مٹی اچھی طرح جم جائے اور منتشر نہ ہو۔ اور اگر بارش کا وقت ہو اور مٹی کے بکھرنے کا اندیشہ نہ ہو، تب بھی اگر کوئی  اتباعِ سنت کی نیت سے  پانی چھڑکے، تو یہ نیت کے لحاظ سے مستحب اور باعثِ ثواب ہوگی۔

عَنْ أَبِي رَافِعٍ قَالَ: سَقَى النَّبِيُّ ﷺ عَلَى قَبْرِ سَعْدِ بْنِ مُعَاذٍ الْمَاءَ، وَأَمَرَ بِهِ أَنْ يُسَوَّى وَأَنْ يُرَشَّ عَلَيْهِ الْمَاءُ. (السنن الكبرى للبیہقی، ج 4، ص 57، رقم: 7087)

"ويستحب أن يسوى القبر ويرش عليه الماء."(الفتاوى الهندية، ج 1، ص 166)

"قوله (ويرش عليه الماء) أي استحباباً، لأن النبي ﷺ فعله بسعد بن معاذ رضي الله عنه." (ردالمحتار، ج 2، ص 233)

 واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3681/47-9713

الجواب

بسم اللہ الرحمن الرحیم:۔  آپ کو اپنی پراپرٹی میں مکمل اختیار ہے جس کو چاہیں آپ دے سکتے ہیں بشرطیکہ کوئی فاسد نیت نہ ہو جیسے کہ وارث کو محروم کرنے کی نیت۔الغرض  اگر آپ اپنی زمین اپنے بھائی کو دینا چاہتے ہیں تو کاغذی کارروائی کے بعد وہ زمین ان کے قبضہ میں دیدیں،  اور اپنا اختیار اس زمین سے ختم کردیں۔ بھائی کی مدد کرنا دوہرے اجر کا باعث ہوگاان شاءاللہ۔تاہم اپنی زندگی میں سب کچھ کسی کو دے دینا اور پھر ضرورت پڑنے پر خود ہی محتاج ہوجانا مناسب نہیں ہے، بہتر ہے کہ اپنے پاس کچھ رکھ کر دوسرے کو کوئی چیز ہبہ کریں۔

 واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3647/47-9747

الجواب

بسم اللہ الرحمن الرحیم:  ۔  یہ مکان جو آپ نے اپنی ذاتی رقم سے خریدا ہے یہ آپ کی ملکیت ہے، اس میں بھائیوں کا یاوالدین کا کوئی حصہ شرعا واجب نہیں ہے، یہ آپ کی ذاتی ملکیت ہے اور آپ کو اس میں تصرف کا مکمل اختیار ہے۔ البتہ اگر آپ نے وہ مکان والد کے نام کردیا تھا اور ان کو مالک بنادیا تھا تو اب اس مکان میں وراثت جاری ہوگی۔

 واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3638/47-9882

الجواب

بسم اللہ الرحمن الرحیم:  ۔ کسی مسلمان کے انتقال کے بعد جو مال، جائیداد، سونا، چاندی، نقدی، گاڑیاں، کاروبار یا سامان اس کے پیچھے رہ جائے، اسے ترکہ کہا جاتا ہے۔ترکہ کو تقسیم کرنے سے پہلے تین چیزیں ترکہ میں سے لازماً نکالی جائیں گی(۱) :کفن دفن کا خرچ بغیر اسراف کے(۲) قرضوں کی ادائیگی اگر مرحوم پر کوئی قرض ہے ، اور (۳)  وصیت کی تکمیل غیروارث کے لئے جو ترکہ کے  صرف ایک تہائی  میں سے جائز ہے، اور خیال رہے کہ وارث کے حق میں وصیت کرنا جائز نہیں  ہے۔ بہرحال   وصیت اور قرض نکالنے کے بعد جو کچھ بچے گا وہ  ترکہ یعنی وراثت ہے۔وراثت کا حق صرف شرعی ورثاء کو ہوگا (بیوی، شوہر، اولاد، والدین، بہن بھائی وغیرہ حالات کے اعتبار سے)۔قرآن کریم (سورۃ النساء، آیات 11-12 ) میں وراثت کے حصے تفصیل سے بیان کیے گئے ہیں ۔ آپ اگر مرنے والے کی جائداد اور ورثہ  کی تفصیلات بھیجیں تو اس کا تفصیلی جواب دیاجائےگا۔

واللہ اعلم بالصواب

دارالافتاء

دارالعلوم وقف دیوبند