Frequently Asked Questions
متفرقات
Ref. No. 3710/47-9839
الجواب
بسم اللہ الرحمن الرحیم:۔ اگر کسی نے یہ کہا: "جب بھی میں یہ کام کروں گا، تو تین دن کے روزے رکھوں گا ۔ یہ دراصل ایک قسم (یمین ) ہے، لیکن اس میں روزے رکھنے کو شرط بنا دیا ہے۔ فقہاء کے نزدیک ایسی قسم بار بار توڑنے پر ایک ہی کفارہ لازم ہوتا ہے، جب تک کہ قسم ایک ہی انداز اور ایک ہی موضوع پر قائم ہو۔اگر وہ نقصان دہ عمل بار بار ہوا، تو شرعاً ہر بار الگ کفارہ لازم نہیں ہوگا، بلکہ صرف ایک مرتبہ کفّارہ ادا کرنا کافی ہے۔ البتہ، اس کے بعد اگر وہ چاہے تو اپنی اصلاح کے لیے نفل روزے رکھ سکتا ہے، لیکن وہ کفّارہ شمار نہیں ہوں گے۔
اللہ تعالیٰ نے قسم توڑنے کے کفّارہ کی تین صورتیں بتائی ہیں: دس مسکینوں کو کھانا کھلانا (ہر ایک کو اوسط درجے کا کھانا)یا دس مسکینوں کو کپڑا دینا یا ایک غلام آزاد کرنا (آج یہ ممکن نہیں) اگر ان تینوں میں سے کوئی بھی استطاعت نہ ہو توتین دن کے روزے رکھے جائیں۔
چونکہ یہ ایک ہی قسم ہے، اس لیے ہزار بار بھی عمل ہوا ہو تب بھی ایک ہی کفّارہ کافی ہے۔ کفّارہ کی ادائیگی کے بعد بھی اگر عادت برقرار ہے تو توبہ اور اصلاح کی کوشش لازمی ہے، تاکہ گناہ دوبارہ نہ دہرایا جائے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3797/47-10166
الجواب
بسم اللہ الرحمن الرحیم:۔ اسلام میں کھانا کھلانا عبادت اور بہت ہی فضیلت والا عمل ہے، خواہ کسی خاص موقع پر ہو یا عام حالات میں ہو ، اور چاہے امیر کو کھلایا جائے یا غریب کوہر حال میں ثواب ملتاہے اور قرآن و حدیث میں اس کی بڑی ترغیب آئی ہے، بشرطیکہ اصل نیت اللہ کی رضا اور خیر خواہی کی ہو ۔تاہم کسی ضرورتمند کی ضرورت پوری کرنا یعنی غریب، مسکین یا محتاج کو کھانا کھلانا اضافی ثواب رکھتاہے۔ حدیث میں تو جانور وں کو کھلانے پر ثواب کا وعدہ ہے تو جب جانور کو کھلانے میں ثواب ہے، تو انسان — خواہ امیر ہو یا غریب — کو کھلانے میں بدرجۂ اولیٰ ثواب ہوگا۔ نیزاہل السنۃ والجماعۃ کا اتفاق ہے کہ کھانا کھلانے کا ثواب مرحومین کو ایصال بھی کیا جا سکتا ہے۔اور کسی نیکی کا ثواب دوسرے کو پہنچاناقرآن و سنت سے ثابت ہے، اور امت کا اجماع ہے کہ ایسا کرنا جائز ہے۔ اس سے معلوم ہوا کہ صدقہ اور نیکی کا ثواب میت کو پہنچتا ہے۔اور کھانا کھلانا بھی صدقہ کی ہی ایک صورت ہے۔اس لئے "تمام اہلِ سنت کا اتفاق ہے کہ صدقہ، دعا، اور خیر کے اعمال کا ثواب میت کو پہنچتا ہے۔"امیر وغریب کسی کو بھی کھانا کھلاکر ایصال ثواب کیاجاسکتاہے۔ تاہم وہ کھانا جو ایصال ثواب کے ارادہ سے ہی بنایاگیا ہو اس میں سے امیر وں کا کھانا درست نہیں ہے۔ اس فرق کو سمجھ لینا چاہئے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3796/47-9887
الجواب
بسم اللہ الرحمن الرحیم:۔ اگر زمین خریدتے وقت نیت صرف مدرسہ دینیہ قائم کرنے کی تھی تو وہ زمین شرعاً اسی مصرف کے لیے استعمال کرنا بہتر ہے، اسے دنیاوی اسکول یا کسی اور مقصد کے لیے استعمال کرنا بہترنہیں ہے۔البتہ اگر خریدتے وقت نیت عمومی تعلیمی یا فلاحی ادارہ قائم کرنے کی تھی تواس کو اسکول بنانا جائز ہوگا۔عوامی چندہ ایک شرعی امانت ہے، اسے صرف اسی مصرف میں خرچ کرنا لازم ہے جس کے لیے جمع کیا گیا ہو۔اگر چندہ دینے والوں نے “مدرسہ کے لیے” چندہ دیا تھا، تو اس کو اپنے ذاتی صرفہ میں لانا جائز نہیں ہے۔ البتہ مدرسہ کے لئے جمع شدہ چندہ سے مدرسہ کی زمین کی خریداری کا قرض اداکرنا جائز ہے،جبکہ لوگوں نے مدرسہ کی نیت سے چندہ دیا ہے۔ لیکن اگر یہ زکوۃ کی رقم ہے تو بلا تملیک شرعی اس سے قرض کی ادائیگی جائز نہیں ہے۔ اگر ٹرسٹی سب امانت دار اور دیانت دار ہوں تو ان کا اپنے گھر یا خاندان سے ہونا جائز ہے، بشرطیکہ وہ مالی بدعنوانی یا شرعی خلاف ورزی نہ کریں۔تاہم چونکہ یہ ادارہ دینی نوعیت کا ہے، اس لیے کمیٹی میں کم از کم ایک یا دو علماء کرام کا شامل ہونا شرعاً اور اخلاقاً ضروری ہے تاکہ ادارے کے فیصلے شریعت کے مطابق رہیں۔
"لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ" (سورہ آل عمران: 92)
«إذا وقف الشيء لله تعالى خرج عن ملك الواقف» (رد المحتار، ج4، ص431)
"إِنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَى أَهْلِهَا" (سورۃ النساء: 58)
«أَدِّ الأَمَانَةَ إِلَى مَنِ ائْتَمَنَكَ، وَلا تَخُنْ مَنْ خَانَكَ» (ابوداؤد: 3534)
"إِنَّ خَيْرَ مَنِ اسْتَأْجَرْتَ الْقَوِيُّ الأَمِينُ" (القصص: 26)
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3783/47-10188
الجواب
بسم اللہ الرحمن الرحیم:۔ انسان کے اعضا میں اگر غیر معتاد طور پر کوئی عیب پیدا ہوجائے تو اسے ٹھیک کرنے میں کوئی حرج نہیں ہے اور اس کو تغییر لخلق اللہ کے زمرے میں شامل نہیں قرار دیں گے، اس لئے بے ترتیب دانتوں کو برابر کرنا وغیرہ؛ ازالہ عیب کی ایک شکل ہے جس کی اجازت ہے۔ تاہم اس کے لیے کوئی ایسا طریقہ اختیارکرنا چاہئے جس میں ہلاکت یا کسی بڑے نقصان کا اندیشہ نہ ہو۔ اسی طرح دانتوں پر اسٹیل کے کیپ وغیرہ لگانے میں کوئی حرج نہیں ہے، اور یہ دانت کے ساتھ اچھی طرح جڑجانے کے بعد دانت ہی کے حکم میں ہوں گے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3776/47-10194
الجواب
بسم اللہ الرحمن الرحیم:۔ ماں کے انتقال کے بعد بچوں کی حضانت کا حق نانی کو ہے، بیٹے کی سات سال کی عمر، اور بیٹی کی بلوغت کی عمر کے بعد ان کی پرورش کا حق باپ کو ہوگا۔ اگر لڑکے کی عمر سات سال ہوگئی اور لڑکی بالغہ ہوگئی تواگر سسرال والے بچوں کو اپنے پاس رکھ کر باپ کو ملنے سے روکتے ہیں یا واپس نہیں دیتے، تو وہ شرعاً ناجائز عمل کر رہے ہیں۔ کیونکہ باپ کو شرعاً اور قانونی طور پر اپنے بچوں کی تربیت، تعلیم، حفاظت اور دینی پرورش کاحق حاصل ہے۔ آپ سسرال والوں سے بچوں کا مطالبہ کر سکتے ہیں، اور اگر وہ نہ مانیں تو قانونی طور پر عدالتِ شرعی (Family Court) میں “Custody of Child” کے لیے درخواست دے سکتے ہیں۔، عدالت بھی عام طور پر باپ کو ہی بچوں کا قدرتی سرپرست تسلیم کرتی ہے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3755/47-10077
الجواب
بسم اللہ الرحمن الرحیم:۔اگر ہجڑے یا ٹرانسجینڈر افراد ناچ، گانے، یا کسی حرام فنکاری کے ذریعے کمائی کرتے ہیں،تو ایسی کمائی شرعاً حرام ہے، اور مسجد جیسی مقدس تعمیر میں خبیث رقم لگانا جائز نہیں ہے ۔اس رقم سے مسجد میں اے سی لگانا بھی جائز نہیں ہے۔ اگر اسی پیسے سے مسجد میں اے سی یا کوئی چیز لگائی گئی ہو توایسا کرنا گناہ ہے لیکن مسجد میں نماز ہو جائے گی۔ کسی غریب کو دے کر اگر مالک بنادیاجائے اور غریب ٓدمی اپنی خوشی سے یہ رقم مسجد میں دیدے تو جائز ہے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3748/47-9848
الجواب
بسم اللہ الرحمن الرحیم:۔ وقف جائیداد کسی شخص کی ذاتی ملکیت نہیں بن سکتی۔لہٰذا آپ کا ابتدائی سرمایہ لگانا ملکیت کے ارادے سے درست نہیں تھا، لیکن چونکہ آپ کو اس وقت اس کے وقف ہونے کا علم نہیں تھا، اس لیے آپ گناہگار نہیں ہیں۔ اب چونکہ آپ نے وہی جگہ وقف بورڈ سے قانونی طور پر لیز پر لے لی ہے، اس لیے آپ کا وہاں سے کرایہ حاصل کرنا جائز اور حلال ہے —بشرطیکہ آپ وقف بورڈ کو طے شدہ لیز کرایہ باقاعدگی سے ادا کرتے رہیں۔اورآپ پر یہ لازم نہیں کہ آپ تحقیق کریں کہ وقف بورڈ وہ کرایہ آگے غریبوں، یتیموں یا دیگر مصارف میں صحیح طور پر خرچ کرتا ہے یا نہیں۔ آپ کی شرعی ذمہ داری صرف یہ ہے کہ آپ اپنا واجب الادا کرایہ وقف بورڈ کو ادا کر دیں۔اس کے بعد کی ذمہ داری وقف بورڈ کے متولیان پر ہے۔چونکہ ابتدائی دور میں آپ کو وقف ہونے کا علم نہیں تھا، اور آپ نے نیک نیتی سے سرمایہ لگایا، اس لیے اس عرصے میں حاصل ہونے والا کرایہ آپ کے لیے معاف (درگزر شدہ) ہے، یعنی واپس کرنا لازم نہیں۔ البتہ اب چونکہ حقیقت واضح ہو چکی ہے، اس لیے آئندہ کے لیے آپ کو خود کو لیز ہولڈر (یعنی کرایہ دار) سمجھنا ہوگا، ملکیت یا فروخت کا کوئی حق آپ کو حاصل نہیں، اور وقف بورڈ کو متعینہ کرایہ دینا واجب ہے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3736/47-9799
الجواب
بسم اللہ الرحمن الرحیم:۔ کرپٹوکرنسی تاہنوز ایک معمہ ہے، جس کی حیثیت مشکوک ہے، جب تک اس کی ایک جہت متعین نہیں ہوجاتی، اس کی خریدوفروخت میں خطرات ہیں اور سرمایہ ڈوبنے کا قوی اندیشہ ہے۔ اس لئے فی الحال اس میں سرمایہ کاری سے گریز کیاجانا مناسب ہے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3725/47-9768
الجواب
بسم اللہ الرحمن الرحیم:۔(۱) اگر کوئی شخص دعا محض عبادت کے طور پر کرے (یعنی اللہ سے مانگنے کی نیت سے) تو اس پر اجرت یا ہدیہ لینا جائز نہیں۔ کیونکہ عبادت کو معاوضے کے ساتھ مشروط کرنا عبادت کی روح کے منافی ہے۔ اگر کوئی شخص دعا کرانے کے بعد از خود امام کو خوشی سے ہدیہ دے دے، اور اس ہدیہ کا لین دین دعا کی شرط یا عوض نہ ہو، تو یہ ہدیہ قبول کرنا جائز ہے۔یعنی:اگر امام نے دعا کے بدلے میں کچھ طلب نہیں کیا،اور دینے والے نے دعا کے عوض دینے کی نیت سے نہیں دیا، بلکہ محض احتراماً یا محبتاً دیا،تو یہ "ہدیہ" شمار ہوگا، "معاوضہ" نہیں۔
(۲) کاروبار میں خیروبرکت یا دفع آسیبی اثرات وغیرہ جیسے دنیاوی حوائج کے لئے اجرت لینا جائز نہیں ہے۔ حضرت تھانوی رحمہ اللہ کے ملفوظات میں لکھا ہے کہ دنیاوی حوائج کے لیے دعا کرنے کے بدلہ اجرت لینا جائز ہے اور دینی حاجت کے لیے دعا کرنے پر اجرت لینا جائز نہیں ہےلہذا اگر زندہ آدمی کے لیے دنیاوی امور ( مثلاً کاروبار میں برکت، شادی، اولاد وغیرہ کی) دعا کی جائے تو اس پر اجرت لینا جائز ہوگا، لیکن دینی امور کے لیے دعا کرنے کی اجرت لینا جائز نہیں ہوگا۔(ملفوظات حکیم الامت، ج:۲۶، ص: ۳۷۵، ط:ادارہ تالیفات اشرفی)۔ اور اگر دونوں نیتیں جمع ہوں تو غالب کا اعتبار کریں گے اور حکم اسی پر دائر ہوگا۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3723/47-9877
الجواب
بسم اللہ الرحمن الرحیم:۔ (۱) نمبر پلیٹ دراصل قانونی اجازت نامہ / لائسنس ہے جو ریاست جاری کرتی ہے۔ یہ ایک "حق (Right)" ہے، کوئی مادی چیز نہیں۔جب ریاست خود اس حق کو فروخت اور نیلام کرتی ہے، تو شرعاً اس کو خریدنا اور آگے فروخت کرنا بیع صحیح کے زمرے میں آتا ہے۔ جس کو جائز قرار دیاگیا ہے.
(۲) اگر کوئی شخص کروڑوں درہم محض اس وجہ سے خرچ کرے کہ نمبر پلیٹ منفردنظر آئے، تو یہ اسراف میں داخل ہوگا۔ اگر مقصد یہ ہو کہ لوگ دیکھ کر تعجب کریں اور اس کی شان بڑھے، تو یہ ریا (دکھاوا) اور تکبر کے حکم میں آ سکتا ہے، جس کی سخت ممانعت ہے۔
كل حقٍ له قيمة شرعًا جازت المعاوضة عليه (الدر المختار مع رد المحتار 6/396) إِنَّ الْمُبَذِّرِينَ كَانُوا إِخْوَانَ الشَّيَاطِينِ (الاسراء: 27) لا يدخل الجنة من كان في قلبه مثقال ذرة من كبر (صحیح مسلم، حدیث 91)
واللہ اعلم بالصواب
دارالافتاء
دارالعلوم وقف دیوبند