اسلامی عقائد

Ref. No. 3890/47-10058

الجواب

بسم اللہ الرحمن الرحیم:۔   (۱) عام لوگوں کے لیے فرشتے کا حالتِ بیداری میں آنا، ان سے گفتگو کرنا، یا مستقل ملاقات رکھنا شرعاً ثابت نہیں۔فرشتوں کا وحی کے ساتھ نزول صرف انبیاء علیہم السلام کے ساتھ خاص تھا۔نبی ﷺ کے بعد وحی، فرشتے کے ذریعے پیغام، یا براہِ راست ملاقات کا سلسلہ ختم ہو چکا ہے۔ نبوت کے ختم ہونے کے بعد کسی غیر نبی کے پاس فرشتہ آنا اور دین یا قرآن سکھانا بالکل ایک باطل دعویٰ ہے۔(۲) قرآن مجید صرف حضرت جبریل علیہ السلام کے ذریعے نبی کریم ﷺ پر نازل ہوا۔یہ عقیدہ قطعی، اجماعی اور ضروریاتِ دین میں سے ہے۔کسی اور فرشتے کا قرآن لانا، یا بعد میں کسی شخص کو قرآن سکھانا کہنا سراسر گمراہی ہے۔ (۳) حضرت جبریلؑ کا نزول نبوت کے ساتھ خاص تھا۔نبی ﷺ کے بعد حضرت جبریلؑ کا کسی سے حالتِ بیداری میں ملنا، گفتگو کرنا یا تعلیم دینا باطل عقیدہ ہے۔ (۴) جو شخص کہے: “مجھے فرشتہ بول رہا ہے” یا “فرشتہ قرآن پڑھا رہا ہے” ایسا کہنا:یا تو صریح جھوٹ، یا شیطانی وسوسہ، یا شدید گمراہی اور بعض صورتوں میں دعویٰٔ نبوت کے قریب پہنچا دینے والا قول ہے۔  اولیاء کرام سے کرامت ثابت ہے،مگر فرشتے سے بیداری میں ملاقات اور قرآن کی تعلیم کرامت نہیں بلکہ باطل دعویٰ ہے۔(۵) خدمتِ خلق نجات یا حقانیت کی دلیل نہیں،نالی صاف کرنا، مسجد کی صفائی، غریبوں کی مدد اچھے اعمال ہیں، مگر غلط عقائد ان اعمال کو بے وزن کر دیتے ہیں، حسنِ اخلاق یا سماجی خدمت باطل عقیدے کو حق نہیں بنا سکتی ہے۔ (۶) اگر کوئی شخص اس بات پر یقین رکھتا ہو کہ فلاں شخص کے پاس واقعی فرشتہ آتا ہے، اور اس کے ذریعے قرآن یا دینی رہنمائی ملتی ہے، تو یہ خطرناک گمراہی ہے، جس سے توبہ لازم ہے۔ (۷) جو شخص یہ عقیدہ رکھتا ہو کہ غیر نبی کے پاس فرشتہ آتا ہے، یا فرشتہ قرآن سکھاتا ہے، تو اس کی امامت مکروہِ تحریمی ہے، ایسے شخص کے پیچھے نماز پڑھنا  بہترنہیں، جب تک وہ اس عقیدے سے صریح توبہ نہ کرلے۔

واللہ اعلم بالصواب

دارالافتاء

دارالعلوم وقف دیوبند

طلاق و تفریق

Ref. No. 3889/47-10057

الجواب

بسم اللہ الرحمن الرحیم:۔بشرط صحت سوال،   صورتِ مسئولہ میں شہرقاضی کی جانب سے دیا گیا یکطرفہ  فسخِ نکاح کا فیصلہ شرعاً معتبر نہیں، اس لیے کہ طلاق کا اختیار اصلًا شوہر کو ہے، قاضی کو از خود طلاق دینے کا حق نہیں۔فسخِ نکاح کے لیے شرعی ثبوت، معتبر شہادت، فریقین کو پورا موقعِ سماعت اور قاضی کا غیر جانبدار ہونا ضروری ہے، جو یہاں مفقود ہے۔محض غیر ثابت الزامات (جیسے قتل کی کوشش) پر نکاح فسخ نہیں کیا جا سکتا۔اگر جان، مال یا عزت کو حقیقی خطرہ ہو تو عدمِ حاضری عذرِ شرعی شمار ہوتی ہے۔لہٰذاشہر قاضی کی جانب سے کیا گیا یکطرفہ فیصلہ شرعاً نافذ نہیں، جبر میں کرائے گئے دستخط باطل ہیں، اور جب تک شوہر خود طلاق نہ دے یا کسی غیر جانبدار شرعی عدالت میں باقاعدہ شرعی فسخ ثابت نہ ہو، نکاح بدستور قائم ہے۔

واللہ اعلم بالصواب

دارالافتاء

دارالعلوم وقف دیوبند

Islamic Creed (Aqaaid)

Ref. No. 3888/47-10070

الجواب

بسم اللہ الرحمن الرحیم:۔ شریعتِ اسلامیہ کے مطابق اصولی بات یہی ہے کہ ایمان کے بغیر اعمالِ صالحہ آخرت میں نجات کا ذریعہ نہیں بنیں گے۔  قرآن کہتاہے:  وَقَدِمْنَا إِلَىٰ مَا عَمِلُوا مِنْ عَمَلٍ فَجَعَلْنَاهُ هَبَاءً مَنْثُورًا (الفرقان: 23) ترجمہ: جنہوں نے ایمان نہیں لایا، ان کے اعمال آخرت میں بکھرے ہوئے غبار کی مانند ہوں گے۱۲۔غیر مسلم اگر نیکی کرے، عدل، خدمت یا اخلاق دکھائے تودنیا میں اسے اس کا بدلہ مل سکتا ہے (عزت، سکون، کامیابی)، مگر آخرت میں نجات ایمان کے بغیر نہیں ہوگی یہی الہی قانون ہے،مگر آخرت کے عذاب میں تخفیف ممکن ہے۔تاہم علماء نے ان لوگوں کے بارے میں تفصیل بیان کی ہے جن تک اسلام کا پیغام بالکل نہیں پہونچا یا صحیح صورت میں نہیں پہنچا، یا تحریف شدہ صورت میں پہنچا،ایسے افراد کا معاملہ اللہ کے عدل و رحمت پر چھوڑا گیا ہے، قطعی حکم نہیں لگایا جاتا۔جو غیر مسلم  ایک اللہ کا قائل ہے لیکن حضرت محمد ﷺ کی رسالت پراس کا ایمان نہیں ہے جبکہ دلالۃً اس تک دعوت پہونچ چکی ہے تو اس کے اعمال نجات کا سبب نہ ہوں گے۔ ہاں جو اللہ پر ایمان رکھتاہو لیکن رسول اللہ ﷺ کی رسالت اس تک کسی بھی طرح نہ پہونچی ہو تو اس کا حساب اللہ پر چھوڑدیاجائےگا۔

واللہ اعلم بالصواب

دارالافتاء

دارالعلوم وقف دیوبند

آداب و اخلاق

Ref. No. 3887/47-10042

الجواب

بسم اللہ الرحمن الرحیم:۔ کسی بھی اجتماعی مسئلہ کو صحیح طور پر سمجھنے کے لیے یہ ضروری ہے کہ انسان محض جذباتی زاویے سے نہیں، بلکہ اسے حقیقی اور عملی زندگی کے تناظر میں رکھ کر دیکھے۔ دنیا کا کوئی بھی اجتماعی نظام ایسا نہیں ہے جو تمام افراد کی مکمل مرضی اور سو فیصد خوشی کے ساتھ قائم رہ سکے، بلکہ ہر اجتماع بعض افراد کی خوشی اور بعض کی ناخوشی کے باوجود باہمی تعاون اور نظم و ضبط کے ذریعے ہی باقی رہتا ہے۔ اگر ہر فرد صرف اپنی خواہش، پسند اور ذاتی خوشی ہی کو معیار بنا لے اور دوسروں کے مفاد، احساسات اور اجتماعی مصلحت کی بالکل پروا ہ نہ کرے تو نہ اتحاد قائم رہ سکتا ہے اور نہ اجتماع اپنی بقا برقرار رکھ سکتا ہے۔

اسی لیے دنیا کے ہر ملک، ہر ادارے اور حتیٰ کہ ادنیٰ سے ادنیٰ جماعت میں بھی اتحاد کو قائم رکھنے کے لیے یہ بنیادی اصول تسلیم کیا گیا ہے کہ کسی ایک کو نظم و انتظام کی ذمہ داری سونپی جائے، تاکہ وہ اپنے علم، تجربہ، عفو و حلم اور قوت کے ذریعے اس جماعت کو اس کی منزلِ مقصود کی طرف منظم انداز میں لے کر چلتا رہے۔ بغیر قیادت اور نظم کے کوئی بھی اجتماع انتشار کا شکار ہو جاتا ہے۔

اسی اصول کے تحت شریعتِ اسلامیہ نے بھی نکاح جیسے نہایت اہم اجتماعی اور خاندانی نظام کو محض جذبات، وقتی خواہشات یا فردِ واحد کی مطلق آزادی پر قائم نہیں رکھا، بلکہ اسے نظم، ذمہ داری اور توازن کے مضبوط اصولوں پر استوار کیا ہے۔ چنانچہ میاں بیوی دونوں کو یکساں طور پر انسانی شرف، عزت اور بنیادی حقوق عطا کیے گئے ہیں، لیکن ساتھ ہی بعض ذمہ داریاں اور حدود بھی مقرر کی گئی ہیں، تاکہ خانگی نظام انتشار سے محفوظ رہے اور گھر امن، سکون اور راحت کا گہوارہ بنا رہے۔

اسی مقصد کے پیشِ نظر شریعت نے ازدواجی زندگی میں شوہر کو قوّام قرار دیا ہے، یعنی گھر کے نظم و نسق، مالی کفالت اور انتظامی فیصلوں کی ذمہ داری شوہر کے سپرد کی گئی ہے۔ یہ قوّامیت اس لیے نہیں کہ شوہر حاکمانہ یا جابرانہ طرزِ عمل اختیار کرے یا بیوی کو محکوم و مجبور بنا دے، بلکہ اس لیے کہ وہ ذمہ داری، عدل اور تحمل کے ساتھ گھر کی قیادت کرے۔ قوّامیت کا مفہوم حاکمیت نہیں بلکہ ذمہ داری ہے، جیسا کہ قرآن کریم میں ارشاد فرمایا گیا:

﴿الرِّجَالُ قَوَّامُونَ عَلَى النِّسَاءِ﴾ (النساء: 34)

اس آیتِ کریمہ کی رو سے مرد کو جو برتری دی گئی ہے وہ فضیلتِ ذاتی یا تحکم کی بنیاد پر نہیں، بلکہ ذمہ داری، کفالت اور بردباری کی بنیاد پر ہے۔ اس کا تقاضا یہ ہے کہ شوہر اپنے علم، تجربہ اور قوت کو استعمال کرتے ہوئے خاندان کی اصلاح کرے، اس کے مسائل حل کرے اور اسے انتشار و فساد سے بچائے، نہ یہ کہ ہر معاملے میں اپنی بات منوانے کو ہی حق سمجھے۔

اسی طرح بیوی کو بھی شریعتِ اسلامیہ نے ایک باعزت، صاحبِ رائے اور صاحبِ حق فرد تسلیم کیا ہے۔ اسے محض ایک تابع دار اور بے اختیار مخلوق نہیں بنایا گیا، بلکہ اسے مشورہ دینے، اپنی بات کہنے اور جائز حدود کے اندر اپنے فیصلے کرنے کا حق عطا کیا گیا ہے۔ نبی کریم ﷺ کی سیرتِ طیبہ اس حقیقت پر شاہد ہے کہ آپ ﷺ گھریلو معاملات میں اپنی ازواجِ مطہراتؓ سے مشورہ فرمایا کرتے تھے اور ان کی آراء کو نہایت وقعت دیتے تھے۔

البتہ چونکہ ہر اجتماعی نظام میں اختلافِ رائے اور مزاج کا فرق ایک فطری امر ہے، اس لیے شریعت نے یہ اصول بھی مقرر فرمایا کہ ازدواجی نظم کو برقرار رکھنے کے لیے معروف امور میں بیوی شوہر کی اطاعت کرے، یعنی ان کاموں میں جن میں نہ ظلم ہو، نہ گناہ، نہ قطعِ رحمی اور نہ بے جا سختی۔ اگر شوہر کسی ایسے امر کا حکم دے جو شریعت کے خلاف ہو یا جس میں واضح ظلم اور اذیت پائی جاتی ہو تو اس میں اطاعت لازم نہیں، کیونکہ شریعت کا مسلمہ قاعدہ ہے: لا طاعة لمخلوق في معصية الخالق

اسی طرح شوہر پر بھی یہ شرعی ذمہ داری عائد ہوتی ہے کہ وہ بیوی کے ساتھ حسنِ معاشرت اختیار کرے، اس کی عزت و آبرو کی حفاظت کرے، اس کے ماضی کو اچھالنے یا معمولی لغزشوں پر مستقل اعتراض کرنے سے اجتناب کرے، کیونکہ ایسا رویہ شریعت کی نظر میں ظلم اور ایذا رسانی کے زمرے میں آتا ہے۔ نبی کریم ﷺ کا ارشاد ہے:خیرکم خیرکم لأهله

پس اسلامی نکاح کا مزاج یہ ہے کہ نہ مرد مطلق العنان ہو اور نہ عورت بے قید، بلکہ دونوں ایک منظم، متوازن اور باہمی احترام و ذمہ داری پر قائم نظام کا حصہ ہوں۔ اگر ہر فریق صرف اپنی خواہش اور خوشی کو ہی معیار بنالے اور دوسرے کے حقوق، جذبات اور مصلحت کو نظر انداز کرے تو نہ گھر باقی رہ سکتا ہے اور نہ خاندان۔ اسی لیے شریعتِ اسلامیہ نے ازدواجی زندگی کی بنیاد توازن، اعتدال اور باہمی تعاون پر رکھی ہے۔

اگر عورت شوہر کے تابع ہو کر زندگی گزارتی ہے تو اس کا مقصد ہرگز یہ نہیں کہ وہ ذلیل، مجبور یا بے وقعت ہے، بلکہ وہ اپنے گھر کے نظم و نسق کو برقرار رکھنے اور خاندانی استحکام کے لیے شوہر کی اطاعت کو ضروری سمجھتی ہے۔ اس میں کوئی شبہ نہیں کہ جن گھروں میں عورتیں شریعت کی حدود کے اندر شوہر کی اطاعت کے ساتھ زندگی گزارتی ہیں، وہاں عموماً سکون، اطمینان اور باہمی ہم آہنگی پائی جاتی ہے اور شدید اختلاف و انتشار کی نوبت کم ہی آتی ہے۔اس کے برعکس جن گھروں میں شوہر کی توہین، بدزبانی، بلا اجازت باہر آوارہ گردی، اور مرد و عورت کے درمیان غیر شرعی مساوات کے نعرے عام ہوں، وہاں نہ صرف گھر کا نظام درہم برہم ہو جاتا ہے بلکہ عفت و عصمت بھی شدید خطرات سے دوچار ہو جاتی ہے۔ یہ ایک عملی حقیقت ہے جو روزِ روشن کی طرح اہلِ نظر کے سامنے واضح ہے۔

شریعتِ اسلامیہ نے اسی خاندانی نظام کو مستحکم بنانے کے لیے عورت کے تمام ضروری اخراجات کی ذمہ داری شوہر پر عائد کی ہے اور طلاق کا اختیار اصولاً شوہر کو دیا ہے، تاکہ وہ ذمہ داری کے ساتھ فیصلہ کرے۔ اگرچہ عورت کو براہِ راست طلاق کا اختیار نہیں دیا گیا، لیکن اسے ظلم و جبر سے محفوظ رکھنے کے لیے خلع، فسخِ نکاح اور دیگر شرعی اقدامات کی اجازت دی گئی ہے، تاکہ کسی بھی فریق پر ناانصافی نہ ہو اور نکاح قید نہیں بلکہ عدل و رحمت کا رشتہ بن کر باقی رہے۔

واللہ اعلم بالصواب

دارالافتاء

دارالعلوم وقف دیوبند

ربوٰ وسود/انشورنس

Ref. No. 3885/47-10040

الجواب

بسم اللہ الرحمن الرحیم:۔    صورت مسئولہ میں سود کا معاہدہ بینک اور حکومت کے درمیان ہے، قرض لینے والا:نہ سود دینے کا پابند ہے، نہ اس پر سود کی شرط ہے، نہ سود اس کے ذمے ہے۔ لہٰذا اگر کوئی شخص سودی معاہدے کا فریق ہی نہیں تو وہ گناہ میں شامل نہیں ہوگا۔ قرض لینے والابینک سے اصل رقم بطور قرض لے رہا ہے،جتنی رقم لی، اتنی ہی واپس کر رہا ہے،اس نے سود پر رضامندی ظاہر نہیں کی، سود ادا کرنے کا کوئی وعدہ یا اقرار نہیں، اس لیے وہ سود دینے والا نہیں کہلاتا۔سبسڈی حکومت کی طرف سے اعانت / امداد ہے، یہ نہ قرض کے عوض مشروط سود ہے نہ بینک کو دی جانے والی زائد رقم،  لہٰذا یہ سبسڈی جائز ہے اور اس کے استعمال میں شرعاً کوئی قباحت نہیں، الغرض  قرض لینے والا،صرف اصل رقم ادا کرے، سود ادا کرنے کا ذمہ دار نہ ہو ، قرض کے کاغذات میں:اس پر سود کی شرط لازم نہ کی گئی ہو، حکومت واقعی سود خود ادا کرے (یہ محض کاغذی نہ ہو) اگر کسی مرحلے پرسود قرض لینے والے پر ڈال دیا جائے، یا بعد میں سود کی ذمہ داری اس پر آ جائےتو پھر یہ معاملہ ناجائز ہو جائے گا۔

واللہ اعلم بالصواب

دارالافتاء

دارالعلوم وقف دیوبند

طلاق و تفریق

Ref. No. 3884/47-10039

الجواب

بسم اللہ الرحمن الرحیم:۔    بشرط صحت سوال صورتِ مسئولہ  میں جب اس شخص نے غصے کی حالت میں اپنی بیوی سے صاف اور صریح الفاظ میں تین مرتبہ کہا:"تجھے طلاق، طلاق، طلاق" تو شرعاً اس  کی بیوی پر تینوں طلاقیں واقع ہوگئیں۔  یہ الفاظ صریحِ طلاق ہیں، جن میں نیت کی ضرورت نہیں ہوت، بعد میں یہ کہنا کہ "میں طلاق نہیں مانتا" اس کا کوئی شرعا کوئی  اعتبار نہیں ،کیونکہ طلاق واقع ہو جانے کے بعد رجوع  سےطلاق ختم نہیں ہوتی ہے۔قرآن مجید میں ہے: الطَّلَاقُ مَرَّتَانِ (سورۃ البقرۃ: 229) یعنی طلاق ایک سنجیدہ اور معتبر معاملہ ہے، محض کہہ دینے سے واقع ہو جاتی ہے۔ حدیث شریف میں آتا ہے: "تین چیزیں ایسی ہیں جن کا مذاق بھی حقیقت ہوتا ہے: نکاح، طلاق اور رجوع" (سنن ابی داود)

واللہ اعلم بالصواب

دارالافتاء

دارالعلوم وقف دیوبند

نماز / جمعہ و عیدین

Ref. No. 3883/47-10037

الجواب

بسم اللہ الرحمن الرحیم:۔    صورتِ مسئولہ میں حکم یہ ہے: اگر امام اپنی قراءت معمول کے مطابق آہستہ ہی کرتا ہے،مگر مائیک کی وجہ سے آواز خود بخود مقتدیوں تک پہنچ جاتی ہے،توامام کی نمازبھی درست ہے اور مقتدیوں کی نماز بھی درست ہے، اس میں کوئی کراہت یا فساد نہیں ہے، کیونکہ سری ہونے کا تعلق امام کے فعل سے ہے، نہ کہ مقتدی کے سننے سےامام نے قراءت کو جہری نہیں بنایا، بلکہ آلہ (mic) نے آواز پھیلا دی۔  احتیاطاً ظہر و عصر میں مائیک کی آواز بہت کم رکھی جائے ،تاکہ سنت و فقہی منہج کی پوری رعایت رہے تو زیادہ مناسب ہوگا۔

واللہ اعلم بالصواب

دارالافتاء

دارالعلوم وقف دیوبند

Family Matters

Ref. No. 3882/47-10055

الجواب

بسم اللہ الرحمن الرحیم:۔   (۱)    اگر مکان یا جائیداد کا حصہ مہر کے کالم میں درج نہیں بلکہ صرف “شرائط نکاح” کے کالم میں درج کیا گیا ہو تو وہ مہر نہیں بنتا ہے بلکہ وہاں جو کچھ لکھا ہو گا، اس کا حکم ہبہ (گفٹ) کا وعدہ یا شرطِ فاسد ہوتا ہے، مہر نہیں ۔ جو چیز صراحتاً مہر کے طور پر ذکر کی جائے وہی مہر بنتی ہے۔لہٰذا مہر کے علاوہ شرط کے طور پر جائیداد دینے کا وعدہ ہبہ کا وعدہ شمار ہوگا۔

(۲)   نکاح کے بعد  اس جائیدادکے لڑکی کی ملک بننے کے لئے دو  چیزیں ضروری ہیں:(الف) ملکیت کا ثابت ہونا،ہبہ  اورگفٹ تب تک مکمل نہیں ہوتا جب تک ہبہ کا ایجاب (یہ حصہ ہم تمہیں دیتے ہیں) اور قبول (لڑکی یا وکیل کا قبول کرنا) نیز قبضہ / تصرف کا اختیار دینا۔ (ب) قبضہ  کا ہونا، اگر قبضہ نہ ہو تو ہبہ مکمل نہیں ہوتا، آپ نے لکھا ہے کہ:، پیمائش نہیں کی گئی، حدود مقرر نہیں ہوئیں، مکمل قبضہ نہیں دیا گیا، تفصیلی تصرف کا حق نہیں دیا گیا،ایسی صورت میں ہبہ شرعاً مکمل نہیں ہوتا، اور ملکیت ثابت نہیں ہوتی۔فقہی قاعدہ:لا یتمّ الهبة إلا بالقبض، لہٰذا صرف نکاح نامہ میں شرط لکھ دینے سے لڑکی اس جائیداد کی مالک نہیں بنتی جب تک قبضہ اور تصرف نہ دیدیا جائے۔

المسمّى مهراً ما ذُكر في صلب العقد على أنه مهر (الھندیہ 1/307)

کل شرطٍ في النکاح لیس من مقتضاه ولا من موجبه فھو شرط فاسد (ھدایہ 2/337)

“لا تجوزُ شَهادةٌ على وصیّةٍ إلا بعد الموت، ولا على هِبةٍ إلا بعد القبض.” (سنن دارقطنی 3/35)

لا تتمّ الهبة إلا بالقبض (فتاویٰ ہندیہ 4/372)

لا یتملّک الموهوب له حتى یتصرف فیه تصرّف الملاك (الحاوی القدسی )

القبض فی العقار یکون بالتخلية والتمکین (بدائع الصنائع 6/129)

واللہ اعلم بالصواب

دارالافتاء

دارالعلوم وقف دیوبند

Family Matters

Ref. No. 3882/47-10055

الجواب

بسم اللہ الرحمن الرحیم:۔   (۱)    اگر مکان یا جائیداد کا حصہ مہر کے کالم میں درج نہیں بلکہ صرف “شرائط نکاح” کے کالم میں درج کیا گیا ہو تو وہ مہر نہیں بنتا ہے بلکہ وہاں جو کچھ لکھا ہو گا، اس کا حکم ہبہ (گفٹ) کا وعدہ یا شرطِ فاسد ہوتا ہے، مہر نہیں ۔ جو چیز صراحتاً مہر کے طور پر ذکر کی جائے وہی مہر بنتی ہے۔لہٰذا مہر کے علاوہ شرط کے طور پر جائیداد دینے کا وعدہ ہبہ کا وعدہ شمار ہوگا۔

(۲)   نکاح کے بعد  اس جائیدادکے لڑکی کی ملک بننے کے لئے دو  چیزیں ضروری ہیں:(الف) ملکیت کا ثابت ہونا،ہبہ  اورگفٹ تب تک مکمل نہیں ہوتا جب تک ہبہ کا ایجاب (یہ حصہ ہم تمہیں دیتے ہیں) اور قبول (لڑکی یا وکیل کا قبول کرنا) نیز قبضہ / تصرف کا اختیار دینا۔ (ب) قبضہ  کا ہونا، اگر قبضہ نہ ہو تو ہبہ مکمل نہیں ہوتا، آپ نے لکھا ہے کہ:، پیمائش نہیں کی گئی، حدود مقرر نہیں ہوئیں، مکمل قبضہ نہیں دیا گیا، تفصیلی تصرف کا حق نہیں دیا گیا،ایسی صورت میں ہبہ شرعاً مکمل نہیں ہوتا، اور ملکیت ثابت نہیں ہوتی۔فقہی قاعدہ:لا یتمّ الهبة إلا بالقبض، لہٰذا صرف نکاح نامہ میں شرط لکھ دینے سے لڑکی اس جائیداد کی مالک نہیں بنتی جب تک قبضہ اور تصرف نہ دیدیا جائے۔

المسمّى مهراً ما ذُكر في صلب العقد على أنه مهر (الھندیہ 1/307)

کل شرطٍ في النکاح لیس من مقتضاه ولا من موجبه فھو شرط فاسد (ھدایہ 2/337)

“لا تجوزُ شَهادةٌ على وصیّةٍ إلا بعد الموت، ولا على هِبةٍ إلا بعد القبض.” (سنن دارقطنی 3/35)

لا تتمّ الهبة إلا بالقبض (فتاویٰ ہندیہ 4/372)

لا یتملّک الموهوب له حتى یتصرف فیه تصرّف الملاك (الحاوی القدسی )

القبض فی العقار یکون بالتخلية والتمکین (بدائع الصنائع 6/129)

واللہ اعلم بالصواب

دارالافتاء

دارالعلوم وقف دیوبند

متفرقات

Ref. No. 3881/47-10102

الجواب

بسم اللہ الرحمن الرحیم:۔      ہما نام رکھنا بھی درست ہے، اس کے معنی ایک خوشبودار گھاس کے بھی آتے ہیں، اور ایک پرندہ کے لئے بھی یہ لفظ بولاجاتاہے۔  اس لفظ کے قریب نام ھدیٰ، حمیرا، حمنہ بھی رکھ سکتے ہیں۔  چند مشہور صحابیات کے اسماء لکھے جاتے ہیں، آپ ان میں سے کوئی نام منتخب کر سکتے ہیں۔ عائشہ، فاطمہ، ام کلثوم، حَفصہ، اسماء، رقیہ، امّ حبیبہ، امّ سلمہ، مریم، جمیلہ، سلمیٰ،  سمیہ، حلیمہ، صفیہ۔

واللہ اعلم بالصواب

دارالافتاء

دارالعلوم وقف دیوبند