مساجد و مدارس

Ref. No. 3792/47-9892

الجواب

بسم اللہ الرحمن الرحیم:۔   مسجد اور اس کی تمام چیزیں، جیسے کہ فرش، لوٹے، قالین، بجلی، برتن، وغیرہ، یہ سب وقف ہیں، یعنی اللہ تعالیٰ کی راہ میں مخصوص کی گئی امانت ہیں۔ اس لیے ان کا استعمال صرف اسی مقصد میں جائز ہے جس کے لیے وہ وقف کی گئی ہوں، یعنی مسجد اور عبادت کے کاموں میں ہی استعمال کی جاسکتی ہیں۔ مسجد کا خادم یا مؤذن اگرچہ مسجد کا نگران اور امین ہوتا ہے، لیکن وہ ان چیزوں کا مالک نہیں ہوتا، اس لئے وہ ان چیزوں کو اپنے ذاتی استعمال میں نہیں لاسکتاہے۔ مسجد کے امام اور موذن کے لئے بھی مسجد کی چیزیں مجبوری میں متولی کی اجازت سے استعمال کرنے کی گنجائش ہوگی۔ تاہم بہتر ہے کہ موبائل کا چارج وغیرہ جیسی ذاتی ضرورت میں مسجد کی چیزیں  استعمال کرنے کے بعد اس کا کچھ معاوضہ بھی مسجد کے فنڈ میں جمع کردیا کریں ۔

واللہ اعلم بالصواب

دارالافتاء

دارالعلوم وقف دیوبند

فقہ

Ref. No. 3791/47-9891

الجواب

بسم اللہ الرحمن الرحیم:۔   بشرط صحت سوال صورت مسئولہ میں  سخت مجبوری میں دوسری جماعت کا انتظام شروع کیاگیا ہے ، اور تمام نمازیوں کی جماعت میں شرکت کے لئے دوسری جماعت قائم کرنے کے علاوہ کوئی چارہ نہیں تھا، اس لئے مذکورہ حالات میں جمعہ کی دوسری جماعت قائم کرنے کی گنجائش ہے۔  دراصل جماعت ثانیہ کی ممانعت  جماعت اولی کی اہمیت  مجروح ہونے کی وجہ سے ہے، لیکن اگر جماعت ثانیہ سے جماعت اولی کی اہمیت پر فرق نہ پڑتا ہو تو جماعت ثانیہ میں کوئی حرج کی بات نہیں ہے۔ 

’’عن الحسن قال: کان أصحاب رسول الله ﷺ  إذا دخلوا المسجد، وقد صلي فیه، صلوافرادی‘‘. (المصنف لابن أبي شیبة، کتاب الصلاة، باب من قال: یصلون فرادی، ولایجمعون. مؤسسة علوم القرآن جدید ۵/۵۵، رقم:۷۱۸۸)

"ولنا أنه علیه الصلاة والسلام کان خرج لیصلح بین قوم، فعاد إلی المسجد وقد صلی أهل المسجد، فرجع إلی منزله فجمع أهله وصلی". ( ردالمحتار، کتاب الصلاة، باب الإمامة، ج۱ ص۸ ۵۱ ۔ط:س ۔ج۱ص۵۵۳۔۱۲)

"قال: (وإذا دخل القوم مسجداً قد صلی فیه أهله کرهت لهم أن یصلوا جماعةً بأذان وإقامة، ولکنهم یصلون وحداناً بغیر أذان وإقامة)؛ لحدیث الحسن: قال: کانت الصحابة إذا فاتتهم الجماعة فمنهم من اتبع الجماعات، ومنهم من صلی في مسجده بغیر أذان ولا إقامة". (مبسوط سرخسی ج۱ ص ۱۳۵)(شامی ج۱ ص۳۶۷ باب الاذان)

واللہ اعلم بالصواب

دارالافتاء

دارالعلوم وقف دیوبند

عائلی مسائل

Ref. No. 3790/47-9893

الجواب

بسم اللہ الرحمن الرحیم:۔ واضح رہے کہ انسان کا اپنی زندگی میں اپنی جائیداد میں سے کسی کو کچھ دینا ہبہ (گفٹ) کہلاتا ہے، ہبہ (گفٹ) کے مکمل ہونے کے لیے ضروری ہے کہ ہبہ کرنے والا  موہوبہ شیئ  کو موہوب لہ کے نام کرنے کے ساتھ اس کا مکمل قبضہ اور تصرف بھی دے دے۔ اس کے بعد سمجھئے کہ:  (۱)   سسر کا  اپنی خوشی سے، شادی کے موقع پر، بہو کو ملکیت کے طور پر مکان یا زمین وغیرہ دینا درست ہے، اگر بطور مہر دینے کی صراحت کی گئی ہے تو یہ  جائدا مہر میں شمار ہوگی، اور وہ خالص سعدیہ عبنر کی ملکیت ہوگی،  اور اس میں قبضہ ضروری نہیں ہوگا، اور سسر کے انتقال کے بعد اس میں وراثت بھی جاری نہییں ہوگی۔ اور اگر سسر نے بطور ہدیہ وگفٹ وہ جائداد دینے کی بات کہی یا لکھی لیکن قبضہ نہیں دیا تھا تو یہ ہبہ مکمل نہیں ہوگا اور اس زبانی یا کاغذی ہبہ نامہ کا کوئی اعتبار نہیں جائے گا۔  (۲) اگر مہر میں جائداد دی گئی ہے تو اس پر فوری قبضہ ضروری نہیں ہے، اس لئے  اگر کابین نامہ (نکاح نامہ) میں یہ صریح الفاظ درج ہیں کہ چار دیواری پر محیط کل مکان کا 1/5 (پانچواں حصہ) مین گیٹ کے ساتھ سعدیہ عنبر کی ملکیت ہے، تو یہ اس کی ملکیت شمار ہوگی، اور  گیٹ والی جگہ بھی اسی مکان کی چار دیواری کے اندر شمار ہوگی جب تک کہ اسے واضح طور پر مشترکہ راستہ یاعام گزرگاہ قرار نہ دیا گیا ہو،یاکسی اور کے لیے مستقل  حقِ راستہ درج نہ ہو۔چونکہ کابین نامہ میں واضح طور پر لکھا ہے کہ چار دیواری پر محیط کل مکان کا 1/5 حصہ مین گیٹ کے ساتھ…” سعدیہ عنبر کی ملکیت ہے تو اس عبارت میں “مین گیٹ کے ساتھ” کا ذکر وضاحت یعنی شمولیت  کے لیے ہے،نہ کہ ملکیت سے استثناءکے لیے، اور نکاح نامہ میں ہونا بطور مہر ہونے کی دلیل ہے، اس لئے  19 مرلے میں سے سعدیہ عنبر کو پانچواں حصہ بطور مہر کے ملے گا۔

وصح ضمان الولي مهرها ولو) المرأة (صغيرة) ولو عاقدًا؛ لأنه سفير، لكن بشرط صحته؛ فلو في مرض موته وهو وارثه لم يصح، وإلا صحّ من الثلث، وقبول المرأة أو غيرها في مجلس الضمان (وتطلب أيًّا شاءت) من زوجها البالغ، أو الولي الضامن (فإن أدّى رجع على الزوج إن أمر) كما هو حكم الكفالة۔ (الدر المختار وحاشية ابن عابدين (رد المحتار) (3/ 140):

واللہ اعلم بالصواب

دارالافتاء

دارالعلوم وقف دیوبند

عائلی مسائل

Ref. No. 3789/47-9896

الجواب

بسم اللہ الرحمن الرحیم:۔جب انسان پر مشکلات یا بیماریاں آتی ہیں، توبعض اوقات یہ  اللہ کی طرف سے آزمائش ہوتی ہیں ۔ بعض اوقات نفسیاتی دباؤ یا نظر بد ہوتی ہے۔ اور کبھی دعا و صبر سے ہی معاملہ بہتر ہو جاتا ہے۔ لہٰذا سب سے پہلے یقین رکھیں کہ کوئی چیز اللہ کی اجازت کے بغیر نقصان نہیں دے سکتی۔ اس کے لئے آپ خود استخارہ کریں ،  کیونکہ شرعاً اپنا ذاتی استخارہ خود کرنا بہتر ہوتا ہے۔  آپ کے حالات کے لحاظ سے ایک مجرب اور بااثر وظیفہ پیش ہے کہ روزانہ صبح و شام  اول و آخر 11 مرتبہ درودِ ابراہیمی۔ درمیان میں “یَا فَتَّاحُ یَا رَزَّاقُ یَا لَطِیْفُ”  313 مرتبہ پڑھیں۔ آخر میں دعا کریں: “اے اللہ! میرے لیے آسانیاں پیدا فرما، میرے رزق، صحت، اور نصیب میں برکت عطا فرما، اور ہر قسم کی رکاوٹ کو دور فرما۔اس کے علاوہ اپنی حفاظت کے لئے ”روزانہ ان آیات کو پڑھ کر اپنے اوپر دم کریں:  سورۃ الفاتحہ — 1 مرتبہ آیت الکرسی — 1 مرتبہ سورۃ الاخلاص، سورۃ الفلق، سورۃ الناس — 3، 3 مرتبہ آخر میں دونوں ہاتھوں پر دم کر کے پورے جسم پر پھیر لیں۔ اس سے جادو، یا نظرِ بد کےدفعیہ میں کافی فائدہ ہوگا ان شاء اللہ۔ یاد رکھئے کسی بھی چیز کی بندش کرنے والی اور کھولنے والی ذات اللہ تعالی کی ہے،( قرآن میں ہے : مایفتح اللہ للنا من رحمۃ  فلاممسک لھا وما یمسک فلا مرسل لہ من بعدہ الآیۃ۔ وان یمسسک اللہ بضر فلاکاشف لہ الا ھو الآیۃ۔ )لہذا غیراللہ کی طرف سے بندش کا عقیدہ رکھنا جائز نہیں ہے۔

واللہ اعلم بالصواب

دارالافتاء

دارالعلوم وقف دیوبند

تجارت و ملازمت

Ref. No. 3788/47-9895

الجواب

بسم اللہ الرحمن الرحیم:۔    اگر آپ مختلف حلال اور یونانی معجونوں کو ملا کر، اپنی محنت، تجربہ، اور اضافی اجزاء سے نئی ترکیب تیار کرتے ہیں، اور واضح طور پر بتاتے ہیں کہ یہ دوا آپ کی تیار کردہ ہے، تو ایسی نئی پیکنگ بنا کر بیچنا شرعاً جائز ہے۔ لیکن اگر کمپنی کی دواؤں کو بغیر تبدیلی کے صرف دوبارہ پیک کر کے کمپنی کے نام سے بیچیں تو یہ ناجائز اور دھوکے کا کام ہے۔اور ایسا کرنا ملکی قانون کے خلاف بھی ہے، اور قانون کے خلاف  کوئی کام کرنا جائز نہیں ہے کہ اس میں عزت و مال کے ضیاع کا اندیشہ ہے۔

واللہ اعلم بالصواب

دارالافتاء

دارالعلوم وقف دیوبند

احکام میت / وراثت و وصیت

Ref. No. 3787/47-9894

الجواب

بسم اللہ الرحمن الرحیم:۔   اگر پہلی میت کی ہڈیاں بوسیدہ ہو کر مٹی میں مل چکی ہوں (یعنی جسم کا کوئی حصہ باقی نہ ہو)، تو اسی قبر میں دوبارہ میت دفنانا جائز ہے۔لیکن جب تک پہلی میت کا جسم یا ہڈیاں باقی ہوں، دوسری میت کو اس میں دفن کرنا ممنوع ہے۔ عام طور پر ۳ سے ۵ سال میں جسم مٹی میں مل جاتا ہے۔لیکن کچھ علاقوں میں نمی یا سخت زمین کی وجہ سے ۷ یا ۸ سال بھی لگ سکتے ہیں۔اس سلسلہ میں ماہرین سے اندازہ لے لیا جائے، اور  اگر قبر کھولنے پر معلوم ہوا کہ پہلی میت ابھی باقی ہے تو مٹی کی آڑ بناکر اس میں دوسری میت  دفن کی جا سکتی ہے۔

"وسئل أبو بكر الأسكافي عن المرأة تقبر في قبر الرجل؟ فقال: إن كان الرجل قد بلي ولم يبق له لحم ولا عظم جاز، وكذا العكس، وإلا فإن كانوا لايجدون بداً يجعلون عظام الأول في موضع، وليجعلوا بينهما حاجزا بالصعید." (حاشية  طحطاوی، ص: 613، ط: دار الکتب العلمیة)

‌"ولا ‌يدفن ‌اثنان أو ثلاثة في قبر واحد إلا عند الحاجة." (الھندیۃ، الباب الحادی والعشرون فی الجنائز، کتاب الصلوٰۃ، ص/166، ج/1، ط/رشیدیہ)

واللہ اعلم بالصواب

دارالافتاء

دارالعلوم وقف دیوبند

تجارت و ملازمت

Ref. No. 3786/47-10187

الجواب

بسم اللہ الرحمن الرحیم:۔ چونکہ لکڑی کے باکس کے ساتھ کوئی معصیت نہیں ہے، بلکہ اس میں مورتی رکھنا اور اس کی پوجا پاٹ کرنا فاعل مختار کا اپنا فعل ہے، اس لئے  کاریگر کے لئے باکس بنانے کی گنجائش  ہوگی۔ تاہم قلبی طور پر کراہت کا احساس ہونا چاہئے کہ بالواسطہ تعاون علی المعصیت  پایاجاتاہے۔  

قال اللّٰہ تعالی :﴿ولا تعاونوا علی الإثم والعدوان﴾ (سورة المائدة، رقم الآیة: ۲)۔

قال العلامة المفتي محمد شفیع رحمہ اللّٰہ تعالی في ”تفصیل الکلام في مسئلة الإعانة علی الحرام“:وإن لم یکن -السبب- محرکا وداعیا؛ بل موصلا محضا، وھو مع ذلک سبب قریب بحیث لایحتاج في إقامة المعصیة بہ إلی إحداث صنعة من الفاعل کبیع السلاح من أھل الفتنة وبیع العصیر ممن یتخذہ خمراً وبیع الأمرد ممن یعصي بہ وإجارة البیت ممن یبیع فیہ الخمر أو یتخذھا کنیسة أو بیت نار وأمثالھا، فکلہ مکروہ تحریما بشرط أن یعلم بہ البائع والآجر من دون تصریح بہ باللسان فإنہ إن لم یعلم کان معذوراً، وإن علم وصرح کان داخلاً فی الإعانة المحرمة (جواہر الفقہ، ۲: ۴۴۷، وص: ۴۵۵، ۴۵۶أیضاً ، ط: قدیم)۔

والثالث بیع أشیاء لیس لھا مصرف إلا فی المعصیة ……ففي جمیع ھذہ الصورة قامت المعصیة بعین ھذا العقد والعاقدان کلاھماآثمان بنفس العقد إلخ (المصدر السابق، ص: ۴۴۲)۔

مستفاد: وفي المحیط: بیع المکعب المفضض للرجل إن لیلبسہ یکرہ؛ لأنہ إعانة علی لبس الحرام، وإن إسکافاً أمرہ إنسان أن یتخذ لہ خفاً علی زي المجوس أو الفسقة أو خیاطاً أمرہ أن یتخذ لہ ثوباً علی زي الفساق یکرہ لہ أن یفعل؛ لأنہ سبب التشبہ بالمجوس والفسقة اھ (رد المحتار، کتاب الحظر والإباحة، باب الاستبراء وغیرہ، فصل في البیع وغیرہ، ۹: ۵۶۲)۔

فإذا ثبت کراھة لبسھا -لبس خاتم الذھب والحدید والصفر وغیرھا-للتختم ثبت کراھة بیعھا وصیغھا لما فیہ من الإعانة علی ما لا یجوز، وکل ما أدی إلی ما لا یجوز لا یجوز، وتمامہ في شرح الوھبانیة (الدر المختار مع رد المحتار، کتاب الحظر والإباحة، فصل اللبس، ۹: ۵۱۸، ۵۱۹)۔

ألا تری أنا نقرھم علی الصلیب ولا یستحق صانعہ أجرة ونقرھم علی التوراة والإنجیل ولو اشتروھا أواستأجروا من یکتبھا لم نحکم بصحتہ فکذلک الترمیم إذا مکناھم منہ لم یحل للسطان ولا للقاضي أن یقول لھم: افعلوا ذلک ولا أن یعینھم علیہ ولا یحل لأحد من المسلمین أن یعمل لھم فیھم ولو استأجروا وترافعوا إلینا حکمنا ببطلان الإجارة ولا نزید علی مجرد التمکین بمعنی التخلیة وترکھم وما یدینون، قال الشارح: وھذا التحقیق الذي ذکرہ الإمام السبکي ھو مراد الشیخین والأصحاب ولا یجوز فھم سواہ، واللہ أعلم انتھی (الأثر المحمود لقھر ذوی العھود للشرنبلالي ص: ۴۴، ۴۵)

واللہ اعلم بالصواب

دارالافتاء

دارالعلوم وقف دیوبند

تجارت و ملازمت

Ref. No. 3785/47-10169

الجواب

بسم اللہ الرحمن الرحیم:۔   اگر ایجنٹ نے خریدار اور بلڈر کے درمیان سودا طے کرادیاتھا اور معاملہ ایجاب و قبول کے ساتھ مکمل ہوگیاتھا تو شرعا اس نے اپنا کام مکمل کردیا، اور کمیشن کا حقدار ہوگیا۔ بعد میں خریدار اگر کسی وجہ سے معاملہ سے پیچھے ہٹ جائے تو اس میں ایجنٹ کا کوئی قصور نہیں ہے، لہذا بلڈر کا ایجنٹ کی کمیشن روکنا درست نہیں ہے۔ ایجنٹ نے محنت کی اور اجرت کا مستحق ہوا، اور اس کی طرف سے کوئی دھوکہ یا فریب نہیں پایاگیا تو کمیشن روکنے کی شرعا کوئی وجہ نہیں ہے۔

واللہ اعلم بالصواب

دارالافتاء

دارالعلوم وقف دیوبند

متفرقات

Ref. No. 3783/47-10188

الجواب

بسم اللہ الرحمن الرحیم:۔  انسان کے اعضا  میں  اگر غیر معتاد طور پر کوئی عیب پیدا ہوجائے  تو اسے ٹھیک  کرنے  میں کوئی حرج نہیں ہے اور اس کو تغییر لخلق اللہ کے زمرے میں شامل نہیں  قرار دیں گے، اس لئے بے ترتیب  دانتوں کو برابر کرنا وغیرہ؛ ازالہ عیب کی  ایک شکل ہے جس  کی اجازت ہے۔ تاہم  اس کے لیے کوئی ایسا طریقہ اختیارکرنا چاہئے جس میں ہلاکت یا کسی بڑے نقصان کا اندیشہ نہ ہو۔ اسی طرح دانتوں پر اسٹیل کے کیپ وغیرہ لگانے میں کوئی حرج نہیں ہے، اور یہ دانت کے ساتھ اچھی طرح جڑجانے کے بعد دانت ہی  کے حکم میں ہوں گے۔

واللہ اعلم بالصواب

دارالافتاء

دارالعلوم وقف دیوبند

نکاح و شادی

Ref. No. 3782/47-10189

الجواب

بسم اللہ الرحمن الرحیم:۔  مہر کی ادائیگی  میں جلدی کرنا بہتر ہے، تاہم اگر شوہر نے ابھی مہر ادا نہیں کیا،تو بھی بیوی اس کی جائز بیوی ہے اور ان کے درمیان ہمبستری (ازدواجی تعلق) جائز ہے۔ اور اس میں کوئی حرج نہیں  ہے۔ مہر کی ادائیگی سے پہلے اگر بیوی صحبت سے منع کرے تو اس کو اس کا حق حاصل ہے۔ بہرحال اولاد ثابت النسب ہوگی اور اس میں کوئی خرابی نہیں آئے گی۔ البتہ بلاوجہ مہر کی ادائیگی میں تاخیر کرنا گناہ کی بات ہے۔

واللہ اعلم بالصواب

دارالافتاء

دارالعلوم وقف دیوبند