Frequently Asked Questions
بدعات و منکرات
Ref. No. 3643/47-9743
الجواب
بسم اللہ الرحمن الرحیم: ۔ ختم قرآن اور ختم بخاری شریف کے موقع پر دعا کی قبولیت آثار و سنن سے ثابت ہے۔ اس لئے دعا کرنے میں کوئی حرج نہیں ہے۔ البتہ طلبہ اور محلہ کے چند لوگ جمع ہوجائیں اس طرح اجتماعی دعا میں بھی کوئی مضائقہ نہیں ہے، تاہم اعلان کرکے منظم طریقہ پر لوگوں کو دور دراز علاقوں سے جمع کرنا درست نہیں ہے، اور اگر خواتین بھی اس اجتماع میں شریک ہوتی ہوں تو اس کی قباحت میں کوئی شبہ نہیں۔ اس لئے اس موقع پر بہت زیادہ اہتمام کرنے سے گریز کیاجائے ورنہ مفاسد سے بچنا مشکل ہوجائے گا۔
واللہ اعلم بالصواب
دارالافتاء
دارالعلوم وقف دیوبند
عائلی مسائل
Ref. No. 3641/47-9744
الجواب
بسم اللہ الرحمن الرحیم: ۔ دونوں بہنوں نے معاملہ کرتے وقت اپنی رضامندی سے قیمت طے کرکے بیع مکمل کرلی ہے، اورآپسی رضامندی سے رقم کی ادائیگی قسطوں میں کرنا بھی طے ہوچکاہے۔ اور قسطوں پر رقم کی ادائیگی میں جو رقم طے ہوجائے اس سے زائد لینا جائز نہیں ہے۔ اس لئے اب یہ مکان زید کی والدہ کی وراثت ہے، اور چاربہنوں کا وراثت کا دعوی سراسر خلاف شرع ہے، اگر طے شدہ رقم ادا ہوگئی تھی، تو یہ مکان زید کی والدہ کی ملکیت ہے، اور مزید کچھ دینے کی ضرورت نہیں ہے۔ زید کو چاہئے کہ اپنی بیوی کو اس سلسلہ میں شرعی مسئلہ سمجھائے کہ ان بہنوں کا اس مکان سے کوئی تعلق نہیں ہے، زید پر لازم ہے کہ حق پر قائم رہے اور والدہ کی جائداد کی حفاظت کی پوری کوشش کرے اور حقداروں کو ان کا حق دلوائے۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3640/47-9742
الجواب
بسم اللہ الرحمن الرحیم: ۔ یوٹیوب جیسے عوامی پلیٹ فارم پر کسی مسلمان، خصوصاً عالمِ دین کو لعن طعن کرنا، گالیاں دینا، یہ صراحتاً حرام اور کبیرہ گناہ ہے۔ ایسے الفاظ استعمال کرنے والے لوگ گناہ گار ہیں؛ ان پر سچی توبہ لازم ہے۔ لہٰذا: جو کچھ کہا/پھیلایا اسے حذف کریں؛ علانیہ معذرت اور تصحیح/تکذیب اسی سطح پر نشر کریں جس سطح پر الزام پھیلایا؛ جس عالم/شخص کی دل آزاری کی اُس سے سفارش و معافی طلب کریں؛
حقیقت اگر ثابت اور مسلمہ ہو تب بھی بلا ضرورتِ شرعی کسی شخص کی عیب جوئی/نشرِ عیب غیبت ہے؛ ضرورتِ شرعی صرف مظلوم کی شکایت، استفتاء، تحذیرِ عام (ضرر سے بچانے)، یا مجرمِ علانیہ کے فساد کو روکنے جیسے محدود ابواب میں، نیت کی اصلاح اور قدرِ ضرورت کے ساتھ جائز ہوتی ہے۔ اس سے تجاوز ممنوع ہے۔ اگر بات غلط نکلی یا غیر ثابت تھی تو یہ بہتان ہے، جو غیبت سے بھی شدید گناہ ہے۔
لَا یُحِبُّ اللّٰهُ الْجَهْرَ بِالسُّوْٓءِ مِنَ الْقَوْلِ الآیۃ(سورۃ النسا، ۱۴۸، پ ۶)“يَا أَيُّهَا الَّذِينَ آمَنُوا اتَّقُوا اللَّهَ وَقُولُوا قَوْلًا سَدِيدًا ۔ (الأحزاب: 70) “وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ” (الحجرات: 11)۔ “وَلَا يَغْتَبْ بَعْضُكُم بَعْضًا۔ (الحجرات: 12) “وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ… فَقَدِ احْتَمَلُوا بُهْتَانًا وَإِثْمًا مُّبِينًا ۔ (الأحزاب: 58) ۔ “وَيْلٌ لِّكُلِّ هُمَزَةٍ لُّمَزَةٍ۔(الهمزة: 1)
“سِبَابُ الْمُسْلِمِ فُسُوقٌ ۔ (بخاری، مسلم)۔ “لَعْنُ الْمُؤْمِنِ كَقَتْلِهِ۔ (بخاری)۔ “لَيْسَ الْمُؤْمِنُ بِالطَّعَّانِ وَلَا اللَّعَّانِ وَلَا الْفَاحِشِ وَلَا الْبَذِيءِ” ۔ (ترمذی)۔ المسلم من سلم المسلمون من لسانه ويده ۔ (بخاری، مسلم) “إن كان فيه ما تقول فقد اغتبته، وإن لم يكن فيه فقد بهتَّه” (مسلم) “إذا قال الرجلُ لأخيهِ يا كافرُ فقد باء بها أحدهما” (بخاری، مسلم)
واللہ اعلم بالصواب
دارالافتاء
دارالعلوم وقف دیوبند
احکام میت / وراثت و وصیت
Ref. No. 3638/47-9882
الجواب
بسم اللہ الرحمن الرحیم: ۔ کسی مسلمان کے انتقال کے بعد جو مال، جائیداد، سونا، چاندی، نقدی، گاڑیاں، کاروبار یا سامان اس کے پیچھے رہ جائے، اسے ترکہ کہا جاتا ہے۔ترکہ کو تقسیم کرنے سے پہلے تین چیزیں ترکہ میں سے لازماً نکالی جائیں گی(۱) :کفن دفن کا خرچ بغیر اسراف کے(۲) قرضوں کی ادائیگی اگر مرحوم پر کوئی قرض ہے ، اور (۳) وصیت کی تکمیل غیروارث کے لئے جو ترکہ کے صرف ایک تہائی میں سے جائز ہے، اور خیال رہے کہ وارث کے حق میں وصیت کرنا جائز نہیں ہے۔ بہرحال وصیت اور قرض نکالنے کے بعد جو کچھ بچے گا وہ ترکہ یعنی وراثت ہے۔وراثت کا حق صرف شرعی ورثاء کو ہوگا (بیوی، شوہر، اولاد، والدین، بہن بھائی وغیرہ حالات کے اعتبار سے)۔قرآن کریم (سورۃ النساء، آیات 11-12 ) میں وراثت کے حصے تفصیل سے بیان کیے گئے ہیں ۔ آپ اگر مرنے والے کی جائداد اور ورثہ کی تفصیلات بھیجیں تو اس کا تفصیلی جواب دیاجائےگا۔
واللہ اعلم بالصواب
دارالافتاء
دارالعلوم وقف دیوبند
عائلی مسائل
Ref. No. 3637/47-9883
الجواب
بسم اللہ الرحمن الرحیم: ۔ شرعی نقطہ نظر سے والدین کی خدمت اور عزت ہر حال میں کرنا ضروری ہے، والدین کے سخت جملے برداشت کریں ان کو جواب نہ یدں، اور اپنی بیوی وبچوں کو بھی یہی تلقین کریں کہ وہ بڑوں کا احترام کرنا سیکھیں، البتہ اگر والدین ضرورتمند نہیں ہیں تو ان پر خرچ کرنا آپ کے لئےلازم نہیں ہے۔ بیوی اور بچوں کے حقوق آپ کے ذمہ ہیں، ان کا خرچ اٹھانا آپ پر واجب ہے۔ لیکن بیوی اور بچوں کی عزت نفس کو بھی قائم رکھیں۔اگر معاملات بہت بگڑ جائیں تو الگ رہنا بھی شریعت میں جائز ہے، بشرطیکہ تعلق اور خدمت برقرار رکھیں۔کسی کی تحقیر کرنا ، دل آزاری والے جملے کہنا گناہ کبیرہ ہے، آپ کے والدین کو ایسی باتوں سے احتراز کرنا چاہئے۔
واللہ اعلم بالصواب
دارالافتاء
دارالعلوم وقف دیوبند
احکام میت / وراثت و وصیت
Ref. No. 3636/47-9884
الجواب
بسم اللہ الرحمن الرحیم: ۔تقسیم میراث سے قبل چند باتیں سمجھ لینی چاہئیں، (۱) سب سے پہلے مرحوم کے ترکہ سے مرحوم کا قرض ادا ہوگا، اور جو کچھ ان کی دوا وعلاج میں خرچ ہوااس کو منہا کیاجائےگا۔ (۲) پوتوں کو اپنے دادا کی میراث میں کوئی حق نہیں ہوگا، ہاں اگر دادا نے پوتوں کے لئے کچھ وصیت کی ہو تو اس کو ایک تہائی میں نافذ کیاجا ئے گا۔(۳) مرحوم نے جو کچھ وصیت اپنی اولاد کے لئے یا بیوی کے لئے کی ہے وہ غیرنافذالعمل ہوگی اور اس وصیت کا بالکل اعتبار نہیں ہوگا۔ شریعت نے ترکہ میں جن کا حصہ متعین کردیا ہے ان کے لئے وصیت کرنا جائز نہیں ہوتاہے۔ (۴) مرحوم کے انتقال کے وقت جو ورثہ باحیات تھے صرف وہی ورثہ ترکہ میں حصہ کے حقدار ہوں گے، اور جن کا مرحوم کی زندگی میں انتقال ہوگیا (جیساکہ حسیب الرحمن) ان کو اور ان کی اولاد(پوتوں) کو وراثت میں سے کوئی حصہ نہیں ملے گا۔
لہذا مرحوم عبدالرحمن کی حیات میں جس بیوی کو طلاق ہوگئی اور جس بیٹے کا انتقال ہوگیا، ان کو وراثت میں حصہ نہیں ملے گا۔ مرحوم عبدالرحمن کی ساری جائداد (زمین، مکان، سونا چاندی روپیہ پیسہ جو کچھ کہ مرنے کے وقت ان کی ملکیت میں تھا) کو اس طرح تقسیم کریں گے کہ مرحوم کی باحیات بیوی کو کل جائداد و اسباب کا آٹھواں حصہ دینے کے بعد باقی کو مرحوم کے تمام باحیات بیٹے اور بیٹیوں میں للذکر مثل حظ الانثیین کے مطابق تقسیم کریں گے۔ سب لوگ اپنا حصہ شرعی حاصل کرنے کے بعد اس حصہ کے مالک ہیں، تقسیم مکمل ہوجانے کے بعد اپنے حصہ کو بیچنا خریدنا وغیرہ جائز ہوگا۔
واللہ اعلم بالصواب
دارالافتاء
دارالعلوم وقف دیوبند
متفرقات
Ref. No. 3635/47-9885
الجواب
بسم اللہ الرحمن الرحیم: ۔ "جواد" عربی زبان کا لفظ ہے۔ اس کے معنی ہیں: سخی، فیاض، بخشنے والا، نیک دل، عطا کرنے والا۔ اس کے معنی اچھے ہیں اور شریعت میں اس کی کوئی ممانعت نہیں۔ اس لیے آپ اپنے بیٹے کا نام "جواد " Jawad رکھ سکتے ہیں۔ یہ ایک اچھا اور بابرکت نام ہے۔
واللہ اعلم بالصواب
دارالافتاء
دارالعلوم وقف دیوبند
نکاح و شادی
Ref. No. 3634/47-9886
الجواب
بسم اللہ الرحمن الرحیم: ۔ اسلامی شریعت میں مسلمان مرد کے لیے نکاح صرف اہلِ ایمان عورت سے جائز ہے۔ اگر عورت مسلمان نہ ہو (یعنی وہ کسی گمراہ فرقے یا غیرمسلم مذہب پر ہو) تو اس کے ساتھ نکاح جائز نہیں ہے۔
آغا خانی (اسماعیلیہ) بنیادی عقائد اوراسلامی شریعت کے واضح احکام سے ہٹے ہوئے ہیں۔ان کے عقائد میں بہت سی باتیں ایسی ہیں جو اسلامی عقیدۂ توحید اور بنیادی ارکانِ دین کے خلاف ہیں ۔ مثلا آغاخانی شریعتِ محمدی ﷺ کی پابندی ضروری نہیں سمجھتے، نماز، روزہ، حج وغیرہ کے احکام کی تاویلات کرتے ہیں، اور اپنے امام (آغا خان) کو دین میں مقتدا و رہنما بلکہ بعض اوقات صفاتِ الوہیت سے متصف سمجھتے ہیں۔اس وجہ سے جمہور علمائے اہلِ سنت کے نزدیک آغا خانی فرقہ اسلام سے خارج ہے۔اگر وہ لڑکی آغا خانی عقائد پر قائم ہے اور اپنے آپ کو اسی پر رکھتے ہوئے نکاح کرنا چاہتی ہے تو آپ کا اس سے نکاح شرعاً جائز نہیں ہے۔البتہ اگر وہ اپنے پرانے عقائد کو چھوڑ کر اسلام میں داخل ہوجائے اور صحیح عقائد (عقائد اہل سنت والجماعت ) اختیار کرے، تبھی اس سے نکاح جائز ہوگا۔
{وَلَا تَنْكِحُوا الْمُشْرِكَاتِ حَتَّى يُؤْمِنَّ وَلَأَمَةٌ مُؤْمِنَةٌ خَيْرٌ مِنْ مُشْرِكَةٍ وَلَوْ أَعْجَبَتْكُمْ} [البقرة: 221]
"ومنها: أن لاتكون المرأة مشركةً إذا كان الرجل مسلماً، فلايجوز للمسلم أن ينكح المشركة؛ لقوله تعالى: {ولا تنكحوا المشركات حتى يؤمن}". [البقرة: 221] (بدائع الصنائع في ترتيب الشرائع (2/ 270):
واللہ اعلم بالصواب
دارالافتاء
دارالعلوم وقف دیوبند
نماز / جمعہ و عیدین
Ref. No. 3633/48-10448
الجواب
بسم اللہ الرحمن الرحیم: ۔ اگر حافظ صاحب کے تلفظ کی غلطی "لحن جلی" کے درجے کی ہے (یعنی قرآن کے معنی بدل رہے ہیں)، تو ان کی امامت میں نماز ہی درست نہیں۔اگر صرف ہلکی ادائیگی کی خامی ہے تو نماز درست ہوگی لیکن مکروہ ہے، خصوصاً جب مقتدیوں میں صحیح قراءت جاننے والے موجود ہوں۔ جس شخص کی قدرتی طور پر داڑھی نہ ہو اس کے پیچھے نماز بلاکراہت درست ہے البتہ داڑھی کاٹنےوالےامام کی اقتداء میں نمازمکروہ تحریمی ہے۔اس لیے بہتر اور درست طریقہ یہی ہے کہ مقتدی حضرات شخص مذکور کو امام نہ بنائیں، بلکہ اپنا امام ایسے شخص کو منتخب کریں جس کی قراءت درست ہو اور جو نماز کے اہم مسائل کا علم رکھتاہو ۔
واللہ اعلم بالصواب
دارالافتاء
دارالعلوم وقف دیوبند
اسلامی عقائد
Ref. No. 3631/47-9843
الجواب
بسم اللہ الرحمن الرحیم: ۔ نبی کریم ﷺ کی سیرت بیان کرنا، نعتیہ اشعار پڑھنا، اور آپ ﷺ کی محبت کو تازہ کرنے والی محفلیں (خواہ کسی بھی وقت ہوں) فی نفسہٖ جائز اور باعثِ خیر ہیں، بشرطیکہ ان میں کوئی ناجائز بات شامل نہ ہو، مثلاً:گانے بجانے کے آلات کا استعمال نہ ہو۔
جھوٹ، غلو (انتہا پسندی) یا شرکیہ باتیں شامل نہ ہوں۔شریعت کے خلاف طور طریقے نہ ہوں۔اس شرط کے ساتھ سیرت کی محفلیں اور نعتیں پڑھنا درست اور باعثِ ثواب ہے۔قصیدہ بردہ شریف امام بوصیریؒ کی لکھی ہوئی مشہور نعت ہے۔ اس کے اکثر اشعار محبتِ رسول ﷺ پر مشتمل ہیں، اور صدیوں سے اہلِ سنت علما اور عوام میں مقبول ہیں۔ اس میں بعض اشعار ایسے ہیں جن میں مبالغہ پایا جاتا ہے، جنہیں اگر عقیدہ سمجھا جائے تو وہ درست نہیں، لیکن اگر انہیں محبت اور شاعر انہ تخلیات کے انداز میں لیا جائےاور انہیں صرف شاعر کا مبالغہ سمجھا جائے (جیسا کہ شعری اسلوب میں عام ہے) تو وہ درست ہیں اور ان میں شرک نہیں ہے۔
اس لیے علما نے وضاحت کی ہے کہ اگر کوئی شخص ان اشعار کو صحیح عقیدہ کے ساتھ پڑھے اور شرعی اصولوں کے خلاف کوئی معنی مراد نہ لے، تو قصیدہ بردہ پڑھنا جائز ہے۔ البتہ اسے نعتیہ انداز میں، ادب و احترام کے ساتھ پڑھنا چاہئے۔
واللہ اعلم بالصواب
دارالافتاء
دارالعلوم وقف دیوبند